Bakasyunista nalumos

Usa ka 17 anyos nga bakasyonista nga gikan sa Manila kinsa mikuyog sa mga kabanay sa pagpangaligo og dagat niadtong Easter Sunday namatay human malumos.

Nahitabo kini alas 9 pasado ang takna sa buntag sa kabanhawan sa beach resort sa Saavedra, Moalboal.

Ang biktima mao si Felix Quivin Ambrad, ulitawo nga lumad nga taga Metro Manila ug mibakasyon lamang sa maong dapit.

Si PO2 Jose Tacoloy sa kapolisan sa nahisgotang lungsod nga gikahinabi sa Banat News miingon nga namatikdan sa mga kauban ang biktima nga misawom sa dagat.

Milungtad og pipila ka gutlo ang pagsawom ug wala na gayod kini motunga nga maoy nakaingon sa kabalaka sa mga kauban niini.

Matud pa ni PO2 Tacoloy nga nagtinabangay sa pagpangita ang kuyog nga mga kabanay ug ilang nadiskubrehang didto kini sa ilawom sa dagat.

Dali kining gitabang sa mga kauban ug gidali paghatod sa Badian District Hospital apan nakabsan gayod kini sa gininhawa. - Romeo T. Limpangog Patay'ng lalaki napalgan Ni Romeo T. Limpangog

Napalgang nagbuy-od sa daplin sa dalan ang patay'ng lawas sa usa ka lalaki kinsa gipusil sa pagpauli gikan sa gitambongang disco atol sa Pasko sa Pagkabanhaw. Nahitabo ang pagpamusil alas 9 pasado ang takna sa miaging gabii sa sitio Kasoy sa General Climaco sa dakbayan sa Toledo.

Ang biktima mao si Geronimo Cabrera, 29 anyos, ulitawo nga taga Hinatongan, General Climaco sa maong dakbayan.

Wala mailhi sa kapolisan ang nagpusil sa biktima apan ilang gituohan nga mitambong usab kini sa gipasiugdahang disco sa kabanhawan ni Ginoong Hesukristo.

Sa nasayran sa Banat News kang SPO3 Barceliso Balicoco sa kapolisan sa maong dakbayan nga miuna lamang pagpauli sa ilang panimalay ang biktima. Sumala pa ni Balicoco nga nag-inusara lamang nga naglakaw ang biktima pauli sa ilang panimalay dihang kalit lamang kining gipusil sa wala pa usab mailhing mamumuno.

Matud pa ni Balicoco nga nagpadayon pa ang ilang pakisusi sa maong pagpamusil sa biktima.