36-anyos patay sa pugakhang

Patay ang usa ka 36-anyos nga lalaki human kini gipugakhang sa kauban sa iyang gipasanginlang mikuha sa iyang jacket ug gihapak pa gyud og bato sa usa sa kauban sa mipusil kaniya niadtong Martes sa gabii diha sa Maghaway, Talisay.

Si Mariano Labajo Jr. nakaangkon og samad pinusilan sa walang bahin sa dughan ug bun-og sa lawas tungod kay gihapak kini sa bato nga maoy gituohang hinungdan sa iyang kamatayon.

Ang mga suspetsado mao si Noli Condor, Anecito Silva ug duha ka wala mailhing mga kauban niini pulos hingkod ang mga panuigon mga residente sa Tapul, Talisay daling miikyas human sa maong hitabo.

Gibutyag kagahapon sa Banat News ni Crisanto Arante, non-uniform personnel (NUP) sa kapolisan sa Talisay kinsa ig-agaw ni Labajo nga nianang udto sa maong adlaw gikomprontase sa biktima si Silva ug gipasanginlang mikuha sa iyang jacket.

Sa wala pa mahitabo ang insidente nag-andam si Labajo og panihapon ug gitawag kini ni Silva aron mogawas sa ilang balay.

Si Arante nagkanayon nga paggawas ni Labajo naglalis pa ang duha apan gipusil ni Condor si Labajo gamit ang pugakhang ug gihapak kini og bato sa usa sa ilang kauban tungod kay wala man kini matumba sa maong pagpamusil.