P300 mil danyos sa bldg nasunog

Gibanabanang mokabat sa P300 mil ang kinatibuk-ang danyos sa nahitabung sunog sa ikatulong andana sa Mingson building nga gipanag-iya sa magpapatigayong si Alfred Chua sa may dalan Zamora atbang sa Basilica Minore del Sto. Niño kagahapon sa buntag.

Nadawat sa mga sakop sa Cebu City Fire Department ang alarma sa sunog mga alas 11:30 sa buntag ug hingpit nga nakontrolar sa mga alas 12 na sa udto nga miabot sa second alarm.

Gibutyag sa guwardiya sa Colon Development Center (CDC) nga nahimutang atbang sa nasunog nga edipisyo nga si Joselito Laurente sa Archangel Security Agency nga nakit-an niya nga dunay mibuto sa linya sa kuryenti sa gawas sa bintana sa ikatulong andana ug paglabay sa pipila ka minutos misunod dayon ang pag-ulbo sa kalayo.

Ang mga kawani sa maong mga buhatan sa maong edipisyo naglumbaanay og kanaog dihang nakalitan sa mitumaw nga sunog.

Si Cebu City Fire Marshal Supt. Esmael Codilla nga maoy nangunay og responde sa fire scene wala mokonpirmar kon unsay hinungdan sa sunog gumikan kay ila pa kini karong gisusi pinaagi sa pagkuha og mga pamahayag sa mga nakasaksi.

Hinuon dunay na-recover nga kuwarta ang mga sakop sa kabomberohan gikan sa drawer sa buhatan ni Atty. Babie Velayo sa ikaduhang andana sa maong edipisyo nga nakaangkon usab og gamay'ng kadaot ug gi-turn over usab dayon ngadto sa tag-iya ang maong salapi.

Nasayran nga karong bulana gi-selebrar ang fire prevention month sa tibuok nasud.