2 grupo's mga sikyu nag-gubat sa M'boal

Upat ka tawo ang naangol human miulbo ang gubat tali sa duha ka grupo sa mga security guards sa kontrobersiyal nga panag-ilog sa luna diha sa Barangay Saavedra lungsod sa Moalboal kagahapon sa buntag.

Parehong nangalandig sa tambalanan ang mga gwardiya sa Safeway Security Agency nga sila si Aurelio Avenido ug Richard Alicarte ingon man ang usa ka sibilyan nga si Rodelyn Callao molupyo sa maong dapit.Naangol usab ang guwardiya sa Grandeur Security Agency nga si Jhunrex Jubay.

Ang maong mga luna giangkon sa Tri-Island Holding Corporation ug mga residenteng nanag-iya'g mga luna nga naghugpong ug mitukod og asosasyon.

Parehong midangop sa buhatan sa Moalboal police station ang isig ka habig sa Tri-Island Holdings Corporation ug grupo sa Safeway Security Agency nga giingong gikontrata sa Land and Beach Owners of Saavedra Association aron mobantay sa ilang mga luna.

Kagahapon sa buntag nahitabo ang duguong panag-engkwentro tali sa Safeway Security Agency ug Grandeur Security Agency diha sa Sitio Bas-Daku sa samang barangay ugmiresulta sa pagkaangol sa tulo ka guwardiya ug pagkaamong usab sa usa ka sibilyan.

Sumala pa ni PO1 Jennelyn Libato sa pakighinabi sa Banat News nga usa ka Mark Anthony Viloria,19 anyos, anak sa usa sa mga land-owner sa maong barangay midangop sa ilang buhatan ug mialegar nga atol sa pagkanaog nila sa motorsiklo uban sa mga guwardiya kalit silang girakrakan sa grupo sa Grandeur Security Agency hinungdan sa nahitabong binayloay og bala sa duha ka grupo.

Samtang dangtan og pila ka gutlo miabot usab ang mga representante sa Tri-Island ug mipasangil nga misulod sila sa Pasiol compound aron unta ayuhon ang gipangguba nga koral dihang kalit lang silang gipabuthan sa grupo sa Safeway.

Matud pa nga walay armas ang ilang mga guwardiyang mi- repair sa kural gawas lang sa mga back-up nga tua sa gawas nagpaabot hinungdan usab sa ilang panagbawsanay og pusil ngadto sa pikas grupo.

Giaresto usab sa kapolisan sa Moalboal ang ubang mga sakop sa Grandeur Security Agency nga sila si Armindazier Atiga, Mario Alcoser, Giovanni Cedeño, Leoncio Paskil, Benedicto Laborera, Ramil Libato ug Vicente Tabañag.

Gikatakdang ipailawom ang mga guwardiya sa paraffin test samtang gikumpiskar usab ang walo ka shotgun ug 77 ka mga bala niini.

Ning tuiga makadaghan nang insidente nga nagkagubot diha sa maong barangay gumikan ra usab sa panag-ilogay sa luna tali sa Tri-Island ug sa mga residente, labing ulahing insidente niadtong bulan sa Nobiyembre diin usa ka wala makabutong granada ang napalgan sa Grandeur Security Agency diha duol sa ilang outpost.