Ginhawaan sa misis migawas

Human sa aksidente sa minahan sa Dalaguete niadtong Sabado sa gabii gitubag kini og laing aksidente sa usa ka quarry sa anapog diha sa barangay Kal-anan lungsod sa Tabogon niadtong Lunes sa hapon diin duha ka managtiayon ang natabunan ug namatay sa mihugnong anapog.

Usa ka oras kapin una pa naugkat ang patay'ng lawas sa managtiayong sila si Democrito ug Angeles Pelayo pulos hingkod ang panuigon ug molupyo sa maong dapit human sila matabuni og gibana-banang lima ka trak nga anapog gikan sa entrada sa ilang gikubkob nga bungtod sa nahisgutang lugar.

Si SPO3 Anecito Pelayo sa pakighinabi sa Banat News mibutyag nga niadtong pipila na ka mga adlaw nagpunay og bunok ang ulan diha sa ilang lugar ug gidudahang gumikan sa napundong mituhop nga tubig diha sa bukid nga gikubkob sa mga biktima maoy nakaingon sa aksidente.

Matud pa ni Pelayo ang kisame sa entrada nahagsa diha sa gikahimutangan sa duha nga kasamtangang nagdukdok sa anapog aron unta ibaligya.

Naabtan pag kapin usa ka oras ang pag-ugkat sa duha bisan gigamitan na sa backhoe sa lungsod apan patay na gyud sila dihang nakuykuyan.

Matud pa ni Pelayo nga nagusbat pag-ayo ang lawas sa babaye gani migawas ang ginhawaan niini gumikan sa grabeng kabug-at sa mihagsa kanila.

Dugang pa ni Pelayo nga niadtong Pebrero pa nakabalik gikan sa Manila ang duha sanglit natangtang isip drayber sa bus si Democrito maong dinhi nalang kini nangaplay sa mga bus companies sa lalawigan.

Apan samtang nagpaabot nga madawat sa giaplayang bus company nangubkob ang magtiayon og anapog alang sa ilang mga anak.

Nasayran nga dunay onse ka anak ang duruha diin ang kinamanghuran 2 anyos pa ang panuigon ug ang kinamaguwangan 20 anyos. Dugang pa ni Pelayo nga ila nang giduol ang Department of Social Welfare Development (DSWD) aron katabangan ang nahibiling mga anak sa duruha.