Colon vendors mikooperar sa SPEED

Malinawon nga gipatuman ang paglimpyo sa aseras sa Colon sa mga sakop sa Squatters Prevention Encroachment and Elimination Division kagahapon sa buntag.

Kini human boluntaryong nanghipos sa ilang mga paninda ang mga vendors nga sakop sa Cebu City United Vendors Association (CCUVA) pagka alas 9 pa sa buntag nga wala na magpaabot pa sa mga sakop sa Squatters Prevention Encroachment and Elimination Division (SPEED).

Matud sa tsirman sa CCUVA Maria Pino igo nalang nga nanghipos sa mga stalls ang mga taga SPEED dihang nangabot kini sa Colon alas 11 na sa buntag.

Nahawan gyud ang tibuok Colon gikan sa may Caltex Station sa Gaisano South hangtud na sa Gaisano Metro nga maoy giuna sa paglimpyo ug gipaabot nga isunod sa pag-demolish ang mga vendors paingon sa Gaisano Metro hangtud sa Mabini.

Gibutyag ni Pino dihang nahinabi sa Banat News nga ilang gipasabot og maayo ang ilang 43 ka mga miyembro gikan sa kapin sa 50 ka mga vendors sa Colon nga apektado sa demolisyon hinungdan nga misunod kini ug mao nay boluntaryong nanghipos sa ilang mga paninda.

Hinuon gipasalig ni Pino nga ilang paningkamutan nga makabalik ang tanan nilang miyembro sa pagpaninda sa Colon ug mao kini usa sa ilang gituki sa meeting sa CCUVA kagahapon ug karung adlawa plano nilang makigtagbo ngadto kang Mayor Tomas Osmeña sa City Hall alang sa maong katuyoan.

Gipasalig usab ni Pino nga andam mosunod ang ilang mga miyembro sa mga palisiya nga ipatuman sa siyudad sama sa 2"x4" nga stalls sa mga prutas ug 2"x3" alang sa mga manindahay og kan-onon sa aseras ug ingon man ang pag-segregate sa mga basura sa malata ug dili malata.

Una nang gibutyag sa consultant sa City hall Gerry Marquez nga ipatuman nila ang gamay'ng kausaban sa aseras aron dili na magpatuyang ang mga vendors nga maninda sa maong dapit ug ingon man mosunod kini sa mga lagda nga ipatuman apil na ang pagbatun ug limpyong palibot ug dili pagbabag sa agianan sa publiko.