Liog gigulgol

Liog sa konduktor kinsa giingong kanhi binilanggo sa Cebu Provincial Detention and Rehabilitation Center gigulgol ug nabulit og samad dinunggaban hinungdan sa iyang kamatayon human kini gitabangan sa duha ka magsuong iyang gikaaway pipila na ka mga semana ang nakalabay.

Wala na matabang sa mga mananambal diha sa Vicente Sotto Memorial Medical Center ang biktimang si Elson Cabañez, 27, ulitawo ug lumad nga taga barangay Canbayong sa maong lungsod kinsa nanginabuhi isip helper sa trak.

Gitumbok ni Compostela Police Chief Ramon Lacno ang mga suspek nga magsuong sila si Edwin, 28 ug Armand Lopez, 22 mga molupyo sa Barangay Panangban.

Sumala pa niya nga anha na magtulugan ang biktima sa balay ni Rosita Tejero nga iyang higala ang pamilya matag kini mag-anhaan sa Sitio Dikyu Barangay Bagalnga, Compostela.

Matud pa ni Lacno nga gitabangan sa magsuon og dunggab ug luglog ang liog ni Cabañez samtang kini natulog diha sa kan-anan sa pamilyang Tejero.

Nakadungog na lang ang managtiayon sa komosyon sa silong ug pag-agulo sa biktima nga nagpakitabang kanila, dihang gisusi nagkadugo na ang liog niini maong dali silang nangayo og tabang sa kapolisan nga mao usab ang midala kaniya sa tambalanan.

Sumala pa ni Lacno ang biktima ug mga suspek kaniadto pa dunay gikasungian nga misangpot sa panagdumot. Midugang si Lacno nga posibleng nasundan ang biktima kun hain kini magtulugan.

Mibutyag nga natanggong na sa CPDRC ang biktima gumikan sa kasong pagpangawat kaniadto.