51-anyos magtutudlo sa Lacion nahug sa ipil-ipil, patay

Nahagbong sa gisak-an nga punoan sa kahoy nga ipil-ipil ang usa ka magtutudlo sa Consolacion National High School ug patay na kining nadiskubrehan sa ilang silingan.

Napalgan kini alas 8 pasado ang takna sa buntag sa miaging adlaw duol sa ilang panimalay nga nahimutang sa Upper Jagobiao sa dakbayan sa Mandaue.

Ang biktima mao si Rene Maglasang, 51 anyos, public school teacher sa Consolacion National High School sa Consolacion, Cebu ug kasamtangang nagpuyo sa maong lugar.

Si Isidro Tangoan, 38 anyos, minyo nga silingan sa maong dapit maoy unang nakadiskubre sa patay'ng lawas sa biktima nga nagluko uban sa mga sanga sa giputol nga ipil-ipil ug mga bato.

Si Cresencia Maglasang, 49 anyos ug asawa sa namatay nga mitug-an nga alas 4 sa hapon niadtong miaging adlaw nga nahiuli sa ilang panimalay ang iyang bana.

Matud pa niya nga kanunay nga dili mahiuli sa ilang panimalay ang biktima kay adto kini matulog sa panimalay sa kauban niining magtutudlo nga maoy hinungdan nga wala na lamang kini matingala nga wala mahiuli nianang gabhiona.

Ang kapolisan nagtuo nga napantok ang ulo sa biktiman ngadto sa dagkong bato dihang nahagbong kini sa gisak-ang ipil-ipil nga maoy nakaingon sa hinanaling kamatayon niini.