Restobar higpitan na sa pag-monitor - CH

Higpitan na sa kagamhanan sa siyudad sa Sugbo ang pag-monitor sa mga restobar og mga establisamento nga namaligya og mga ilimnong makahubog ug uban pang mga patigayon dinhi sa dakbayan.

Nipatawag og executive session ang konseho sa dakbayan karong Septiyembre 7 nga nagdapit sa City Treasurers office, hepe sa Business Permit Section, Liquor and Licensing Commission ug sa mga sakop sa joint inspection team.

Kini maoy aksiyon nga gihimo sa konseho human miduso og resulosyon si Konsehal Procopio Fernandez, tsirman sa Committee on Police atol sa milabay'ng sesyon sa konseho nga nag-awhag sa pagpatawag sa maong executive session.

Kini tungod sa nadawat nga daghang reklamo atol sa milabay'ng tigum sa Cebu City Anti Indecency Board (CAIB) ug naglakip na kini sa gireklamong Halo Resto Bar nga nahimutang sa may North Reclamation Area.

Kini tungod kay gawas nga mi-operate kini sa maong negosyo nga walay permiso, wala pa gyud kini fire exit nga magamit sa emerhensiya sama sa sunog ug samok ug huot usab kaayo ang mga kustomer niini ilabi na panahon sa mga adlaw'ng Sabado ug Domingo.

Laing nadawat nga reklamo sa CAIB mao ang na-isyuhan og business permit nga video karaoke sa may Duljo-Fatima bisan ug wala kini makatuman sa City Ordinance 1940.

Apil na ang usa ka sari-sari store sa may Plaza Independencia nga mokawat kawat pagpamaligya og mga ilimnong makahubog ilabi na panahon sa mga adlawng Sabado ug Domingo.