Dalaga giluba human misukol sa 3 ka tulisan

Usa ka dalaga gidunggab sa kilid human kini misukol sa tulo ka mga batan-ong tulisan nga pugsanong mikuha sa iyang bag diha sa dalan C.Padilla barangay Mambaling ning dakbayan niadtong nakalabay'ng gabii.

Si Sofia Dayonot Tariman, 24, molupyo sa naasoy'ng lugar kasamtangang naglakaw sa maong dalan dihang kalit nga giliputan sa tulo ka wala mailhing mga batan-ong armado og mahait nga hinagiban.

Ang mga gikatahapan midemanda sa bag nga gidala sa biktima apan dihang gibira kini sa mga suspek misukol ang biktima ug misuway sa pag-ikyas, ning tungura usa sa mga suspek ang kalit nga midunggab sa kilid sa biktima dayong ikyas palayo sa maong lugar.

Kini maoy ikaduhang insidente nga nadunggaban ang mga biktima sa mga tulisan sulod sa tulo ka adlaw sukad niadtong Sabado sa gabii diin usa ka taxi driver ang giduslak og kutsilyo sa liog dihang midumili paghatag sa iyang kinitaan ngadto sa pasaherong tulisan diha sa dalan.B Rodriguez ning dakbayan.