'Hiwalay na korte para sa Maguindanao masaker'

MANILA, Philippines – Isang opisyal ng isang human rights group ang nagmungkahi sa Deparment of Justice (DOJ) na humilling na gumawa ng isang korte na tututok lamang sa mga kasong may kinalaman sa Maguindanao masaker.

Sinabi ni H.R. Dipendra, director ng Media Legal Defense-Southeast Asia, na mas mapapabilis ang proseso ng multiple murder na kaso kung may espesyal na korte ang tututok dito.

"The court would only take care of all the motions by both parties... The court should not allow for any delay [of the trial] and do away with frivolous motions," pahayag ni Dipendra sa isang media briefing sa UP Law Center Quezon City.

Iminungkahi din ni Dipendra kay Judge Jocelyn Solis-Reyes na bawasan ng huwes ang bilang ng mga akusadong dumadaan sa paglilitis at pagtuunan ng pansin ang mga pangunahing akusado, gaya ng mga miyembro ng pamilya Ampatuan sa pangunguna ni dating Maguindanao governor Andal Ampatuan Sr.

"Maybe we focus on the principal accused...three years is too long for this case to be tried," aniya.

Nanawagan naman ang private prosecutor na si Gilbert Andres kay Presidente Benigno Aquino III at Interior and Local Government Secretary Mar Roxas na paigtingin pa ang kampanya upang maaresto ang 91 pang akusado.

Noong Nobyembre 23, 2009, pinangunahan umano ni Andal Ampatuan Jr. ang isang private army sa pagdukot at brutal na pagpaslang sa 58 indibidwal kabilang ang 32 mamamahayag at kapamilya ni Maguindanao Gov. Esmael Mangudadatu.