Meralco, NLEX banat na
CEBU, Philippines - Ang managsuong koponan Meralco Bolts ug NLEX Road Warriors sa Philippine Basketball Association (PBA) nagpanikad nang molingaw sa mga Sugbuanon nilang fans kay ang 1st Recoletos Invitational Cup mosikad na karong adlawa diha sa Recoletos Coliseum sa University of San Jose-Recoletos Basak campus.
Ang Bolts nga maoy runner-up sa Barangay Ginebra Gin Kings sa bag-o lang natapos nga PBA Governors’ Cup, makigtakus batok sa usa ka seleksiyon gikan sa reigning Cebu Schools Athletic Foundation, Inc. (CESAFI) champion University of the Visayas Green Lancers, University of San Carlos Warriors ug University of Cebu Webmasters sa main game nga gikatakda sa alas-7 sa gabii.
Samtang ang Road Warriors makigtigi batok sa Cebu Landmasters sa pasiunang duwa nga gikatakda sa alas-5 sa hapon. Ang Cebu Landmasters langkuban og mga magduduwa gikan sa host USJ-R Jaguars ug University of Southern Philippines (USPF) Panthers.
Moduwa sila ubos sa single round robin format. Ang team nga dunay labing nindot nga rekord human sa tulo ka adlaw nga torneyo maoy awtomatik nga ideklara nga kampiyon.
Ang mga tiket nagkantidad og P50 sa upper box ug P100 sa lower box. (BANAT NEWS)
- Latest