Diwa sa EDSA inanay’ng gipatay

Handumon ugmang adlawa ang ika-31 ka tuig nga sumad sa EDSA People Power Revolution, apan kutob na lang sa paghandum kay wala na ang bongga nga selebrasyon ubos niining Duterte administration.

Dili na  kini ikahibulong pa, sanglit tataw kaayo nga gipangga ug gipaboran ni Digong ang pamilya sa diktador nga si kanhi presidente Ferdinand Marcos kinsa gipalagpot sa gahum kaniadto pinaagi sa bloodless revolution.

Wala na’y mahitabo nga symbolic nga seremonyas, o reenacment sa panagtagbo sa mga EDSA key players, sama nila ni kanhi presidente Fidel Ramos ug kanhi senador Juan Ponce Enrile.

Imbes sa People Power Monument ang kalihokan sa paghandum, adto na lang kini ipahigayon sulod sa Camp Aguinaldo. Matud ni Presidential Spokesman Ernesto Abella nga panahon na nga mo-move on kita ug dili na magpagapos sa panghitabo sa kasaysayan.

Pastilan, wala siya kuyapi sa iyang gipanulti nga iyang gikalimtan ang katawhang Pilipinhon nga nakigbisog aron makalingkawas sa koko sa diktador nga naghari sulod sa hataas nga katuigan?

Labaw sa tanan, gusto na lang nila ilubong sa kalimot ang daghan nga mga kinabuhi nga nakalas ug kadtong mga “desaparecidos” kon biktima sa pinugos nga pagkahanaw atol sa rehimengMarcos.

Hinuon expected na kining mahitabo sa administrasyong Duterte kinsa una na nga mitugot nga malubong si Marcos sa Libingan ng mga Bayani.

Samtang ang mga Filipino mismo nagpaanod sa sulog ug mikalawat na sa baruganan sa namunoan karon ug inanay na nga gipatay sa ilang panumdoman ang kagahapon nga naghatag kanato sa kagawasan.