Melindo, 'Prince' Albert' adunay misyon

CEBU, Philippines - Duha ka ALA Gym  boxers nga sila si Milan ‘El Metodico’  Melindo ug  ‘Prince’ Albert Pagara  nagtinguha nga mopadangat og mensahe nga buhi pa ilang mga damgo nga mahimong world champion sa dihang sangkaon nila ang ilang tagsa-tagsa ka kaatbang sa ika-39 nga edisyon sa Pinoy Pride boxing series karong Nobiyembre 26 diha sa Cebu Coliseum.

Ang 28-anyos nga si Melindo (34-2, 12KOs)  laraw nga  kuhaon na sa hingpit  ang kalibotanong bakus human sa duha ka higayon niya nga pagsuway. Si Melindo makigharong  ni Thai fighter Fahlan Sakkreerin (31-4, 16KOs) alang sa interim IBF light flyweight belt.

“I am blessed kay nahatagan ko’g laing chance nga mahimong world champion. Gusto ko nga makuha na ang world title karon,” matud pa ni Melindo atol sa press conference kagahapon didto sa Abuhan Tres sa Cebu IT Park.

Sa una niyang  title fight, si Melindo napukan ngadto ni Juan Francisco Estrada pinaagi sa unanimous decision  niadtong tuig 2013. Sa ikaduha niyang pagsuway, napilde na sab siya pinaagi sa sixth round technical decision atol sa ilang IBF title match ni Javier Mendoza niadtong Mayo 30, 2015 didto sa Mexico.

Kun modaog, si Melindo mahimong mandatory challenger ni Japanese champion Akira Yaegashi nga wala makadepensa sa iyang bakus tungod sa injury.

Si Pagara (26-1, 18KOs), sa iyang bahin, mosuway pagpapas sa huna-huna sa iyang mga fans ang ngil-ad niyang eight round knockout nga kapildihan batok ni Mexican Cesar Juarez niadtong Hulyo 7 didto sa California.

Ang 22-anyos nga boksidor makigharong sa Ghanaian nga si Raymond Commey sa supporting bout.

“Sa tinuoray lang, ganahan na ko moundang sa boxing human ato,” matud pa ni Pagara. “Pero akong family especially ako asawa niingon nga dapat ko mopadayon. Bata pa ko ug taas pa ko og maabtan.”

Sa laing bahin, ang WBO No. 1 junior welterweight nga si Jason ‘El Niño’ Pagara (39-2, 24KOs) misaad og ‘knockout’ nga kadaugan batok ni Nicaraguan Jose Alfaro (28-10, 24KOs).

Sa undercards, laing lima ka mga ALA boys  nga sila si Jeo ‘Santino’ Santisima, Jimmy ‘Popeye’ Paypa, Jonas ‘Zorro’ Sultan, Melvin ‘Gringo’ Jerusalem ug Kevin Jake ‘KJ’ Cataraja ang mopakita sab og aksiyon sa maong boxing card. (BANAT NEWS)