Donaire nangandam sa mga 'boos'

CEBU, Philippines — Gitug-an ni kanhi four-division world champion Nonito Donaire Jr. nga gawas sa pisikal nga preparasyon ug ensayo, giandam usab niya iyang mental nga aspeto isip fighter alang sa umaabot niyang sangka batok ni Irish star Carl Frampton sa Abril 21 didto sa Belfast, Ireland.

Si Donaire miingon, kasagaran siya ang abibahan sa iyang mga sangka, apan lahi ang nagsingabot niyang away ni Frampton tungod kay segurado nga uwanon siya og ‘boos’ gikan sa mga Irish boxing fans.

Nakatilaw dayon si Donaire sa aslom nga pagtagad gikan sa mga fans atol sa ilang press conference didto sa Ireland kagahapon. Si Frampton usa ka sikat nga boksidor sa Ireland diin grabe ang suporta sa iyang mga fans bisan pa og nahanaw na kaniya iyang WBA featherweight title niadtong miaging tuig human mapilde ni Leo Santa Cruz.

Apan si Donaire nagkanayon nga di niya panumbalingon ang mga Irish tungod kay  determinado siya nga modaog ug makakuha og kahigayonan nga moaway alang sa world title.