Cavs nakalingkawas Lakers rookie Lonzo Ball mikulit og NBA record
CEBU, Philippines — Miagi pa og kulba ang Cleveland Cavaliers aron makuha ang 111-104 nga kadaugan batok sa naglisud nga Dallas Mavericks kagahapon didto sa American Airlines Center sa Dallas, Texas.
Ang Cavs kinahanglan pa nga mulusad og bangis nga rally sa daginutong minuto sa fourth period aron pildehon ang Mavs nga misikit sa iskor 104-100 sa katapusang uno minuto sa duwa. Labaw og onse puntos ang Cavs pagsulod sa final quarter, apan wa sila kasagang sa ratsada sa Mavericks.
Misalbar sa Cavs ang init nga three-point shooting ni Kyle Korver kinsa mirehistro og 13 puntos sa katapusang kuwarter, samtang si Kevin Love ug LeBron James miiskor og 29 ug 19 puntos matag usa. Ang Cavs mipalambo sa ilang record sa 6-7, apan dili igo aron isulod na sila sa top eight sa Eastern Conference division.
Sa laing bahin, didto sa Milwaukee, ang rookie sa Los Angeles Lakers nga si Lonzo Ball mikulit og record isip labing bata nga player sa kasaysayan sa NBA nga morehistro og triple-double sa iyang 17 puntos, 13 ka assists ug 12 ka rebounds.
Ang 20-anyos nga si Ball mihatag sa iyang tanan, apan dili kini igo aron ituboy ang Lakers sa kadaugan batok sa Milwaukee Bucks, 90-98.
Wa kasugakod ang Lakers sa pagbangis sa usa sa mga rising star sa liga nga si Giannis Antetokounmpo kinsa midarok og 33 puntos ug milangkat og 15 ka rebounds.
Sa ubang resulta sa mga duwa, ang defending champion nga Golden State Warriors milubong sa Philadelphia 76ers, 135-114, sa pagpangulo ni Kevin Durant kinsa adunay 29 puntos. Kini pa lang ang pagbalik og duwa ni Durant human kini gipapahuway tungod sa injury.
Subli usab nga mipakita sa iyang katakus sa opensa si James Harden human siya mipuntos og 38 aron bidahan ang Houston Rockets batok sa Memphis Grizzlies. Ang San Antonio Spurs miihaw sa Chicago Bulls, 113-94, ang Denver Nuggets mipayukbo sa Orlando Magic, 125-107, ug ang New York Knicks mikolekta og laing daog batok sa Sacramento Kings, 118-91. (BANAT NEWS)
- Latest
