‘Triple-double’ dayon si Westbrook
CEBU, Philippines — Naka-triple double dayon si Russell Westbrook sa dihang ang Oklahoma City Thunder mipakugang sa New York Knicks, 105-84 sa labing una nilang duwa uban ang ilang duha ka bag-ong All-Stars nga sila si Paul George ug Carmelo Anthony kagahapon didto sa Chesapeake Energy Arena sa Oklahoma.
Si Westbrook, ang MVP sa miaging season human mi-average og triple-double tibuok season, mikadlit og 21 points, 16 assists ug 10 rebounds sa buena manong kadaogan sa Thunder.
Nagparamdam sab dayon si Paul George pinaagi sa pagpatuasik og 28 puntos, samtang si Anthony mitikdol og 22 puntos batok sa kanhi niya team.
Dominado kaayo sa Thunder ang duwa ug wala na sila molingi pa human miposte og 17 puntos nga labaw, 69-52 human sa duha ka sagunson nga dunks nilang Steven Adams ug Andre Roberson sa ikatulong kuwarter.
Si Kristaps Porzingis mitali og 31 puntos ug 12 ka rebounds alang sa Knicks, samtang si Enes Kanter nga nalabay sa Knicks human sa trade nga naghatod ni Anthony sa Thunder, mitapos uban ang 10 puntos ug pito ka rebounds.
Didto sa Staples Center, si Blake Griffin mikadlit og 29 puntos, si DeAndre Jordan mitampo og 14 puntos ug milangkat og 24 ka rebounds sa LA Clippers nga milampurnas sa LA Lakers, 108-92.
Hilom kaayo ang NBA debut sa pambatong rookie sa Lakers nga si Lonzo Ball nga mitala lamang og tres puntos, upat ka assists ug siyam ka rebounds sulod sa 29 minutos.
Sa lain pang aksiyon, si Jonas Valanciunas miposte og 23 puntos ug 15 ka rebounds, samtang si C.J. Miles mipupo og 22 puntos sa dihang giihaw sa Toronto Raptors ang Chicago Bulls, 117-101.
Dako sab og naabag sa Raptors sila si Norman Powell, Delon Wright ug Kyle Lowry nga nagkumboya’g 40 puntos. (BANAT NEWS)
- Latest
