Mga juice makapaalibyo (2)

Apple juice — Para sa konstipasyon. Usa ka apple nga kuhaan sa mga liso, tunga sa kutsarita nga pinulbos nga anis (fennel powder), ug tunga sa tasang tubig.

Unsaon paghimo? Hiwaon og pino ang apple ug ibutang sa blender. Dugangan og tubig, dayon paandaron ug inigkapino na, ihuwad sa baso, idugang ang anis dayon kutawon ug imnon. Sulaye kini kay ang apple dasok sa fiber minerales ug mga bitamina. Duna sab ni epekto nga pampurga, ug ang anis dasok sab sa dietary fiber nga makapahumok og dali ra makalibang.

Orange juice — Para sa konstipasyon. Usa ka tasang tinadtad nga orange pudyot sa blacksalt o sea salt. Unsaon paghimo? Ibutang ang tinadtad nga orange sa blender unya paandaron. Inighuman, ihuwad sa baso ug butangan og pudyot sa asin dayon kutawon ug imnon.

Sulaye kini kay ang orange dasok sa tinubdan sa bitamina-C, minerales ug dietary fiber, nga makatabang pagpahumok sa solido nga hugaw, aron dili maglisud nga makalibang.

Lemon juice — Para sa konstipasyon. Tunga sa lemon, usa ka tasa nga tubig init usa ka kutsarita’ng honey ug tunga sa kutsarita nga cumin powder.

Unsaon paghimo? Ibutang sa tasa ang juice, honey, ug cumin ug tubig-init, nga kutawon pag-ayo, dayon imnon. Sulaye kini kay ang duga sa lemon dasok nga tinubdan sa dietary fiber ug bitamina-C, nga dili lang makatabang sa konstipasyon, kondili, hasta sab sa pagpalig-on sa sistema sa imyon. Ang cumin sab maoy moareglar sa pagminten nga pahimsogon ang sistema sa ‘digestion’.

Kining mga juice  nga atong gihisgotan, duna sab ni mga laing-epekto (side-effect), sama sa mosaka ang lebel sa bloodsugar kon magpalabi og inom niini.