Beermen nanganti
CEBU, Philippines - Nanganti ang San Miguel Beermen mohimo og laing dominante nga kadaugan batok sa ilang sister-team Barangay Ginebra sa Game-2 sa ilang “best-of-seven” finals series sa PBA Philippine Cup.
Human nila gilubong ang Ginebra sa Game-1 niadtong Biyernes, ang San Miguel naglaum nga magpabilin ang kainit sa ilang duwa karon nga sugdan sa alas-6:30 sa gabii didto sa Quezon Convention Center.
Si Beermen coach Leo Austria nagkanayon nga gawas sa momentum, mas kondisyon sab sila itandi sa Ginebra nga miagi og lisud nga dalan paingon sa finals.
Miingon ang multi-titled coach nga sa ilang paglubong sa Gin Kings, mas nakapahuway og taas ang iyang mga key players ilabi na si JuneMar Fajardo, kinsa gipaabot nga mowadwad karong gabii.
Sama sa nahitabo sa Game-1, si Austria naglaum nga daghan ang motampo sa scoring isip suporta usab ni Fajardo. Si Fajardo kinsa adunay 17 puntos sa miaging duwa giabagan nila ni Chris Ross, Alex Cabagnot, Gabby Espinas ug Ronald Tubid.
Sa iyang bahin, si Ginebra coach Tim Cone miangkon nga ubos ang ilang moral human sila gikunis-kunis sa San Miguel, apan misaad siya nga makahimo sila og adjustment aron makatabla sa serye.
Gikuha usab ni Cone ang atensiyon sa duha niya ka mga star players nga sila si LA Tenorio ug Japeth Aguilar nga igo lang miiskor og singko puntos matag usa sa miaging duwa. (BANAT NEWS)
- Latest
