Kontraktor gidul-itan og pusil

Patay diha-diha ang kontraktor sa Tsuneishi Industries human kini gidul-itan og pusil sa ulo nga milapos sa iyang agtang ang bala samtang namalit og lotto didto sa barangay Buanoy, lungsod sa Balamban niadtong Lunes sa alas 7 sa gabii.

Ang biktima mao si Marcial Honculada, 50, minyo, kontraktor sa Tsuneishi ug nanag-iya usab og construction firm sa maong lugar.

Matud ni SPO2 Arvie Banate, imbestigador sa Balamban Police Station sa dihang nahinabi sa Banat News naglinya ang biktima kauban sa mga kustomer aron pagpalit unta og lotto sa dihang mikalit og abot ang duha ka suspek nga nagtaptap sa nawong.

Ang usa niini maoy miduol sa biktima ug mideretso og pusil sa biktima nga nagtalikod niadtong tungora samtang ang kauban niini maoy nagsilbing look out.

Naigo sa ibabaw nga bahin sa tangkugo ang biktima ug milapos ang bala sa agtang nga maoy hinungdan sa hinanali nga kamatayon niini.

Sa pagresponde sa kapolisan naka-eskapo na ang mga suspek ug wala usay mga saksi nga nakaklaro sa mga hulagway niini ilabi na kay ngitngit usab ang maong lugar ug yano ra kaayo kining nanglakaw pahilayo.

Matud ni SPO2 Banate tulo ka mga anggulo ang ila karong gisubay sa nagpadayong imbestigasyon una mao ang milabay niining panaglalis tali sa mga kabilin nga yuta sa ilang pamilya ilabina kadtong nahimoan na og “deed of donation”.

Ikaduha mao ang gika-report nga panagsungi niini tali sa iyang mga trabahante diha sa gikontrato niining trabaho sa Tsuneishi may labot sa pagmagahi sa biktima sa higayon nga mohangyo ang mga kawani niini nga mo-bali og kwarta.

Samtang ikatulo nga anggulo nga padayong gisubay matud ni SPO2 Banate mao ang wala pagkasinabot niini tali sa iyang mga trabahante sa project niini nga commercial building sa maong lungsod diin giusab ang pagtrabaho niini tungod kay nasayop nga miresulta sa panagsinukliay og mahait nga pulong ngadto sa iyang mga tawo.

Ang kapolisan naka-recover og duha ka kabhang sa kalibre .45 sa crime scene.