2 milyon nidagsa

CEBU, Philippines — Gibana-banang dos milyones ka mga tawo ang nanan-aw sa Sinulog 2018 Grand Parade kagahapong adlawa sumala pa sa tigpamaba sa Police Regional Office 7 nga si Supt. Reyman Tolentin.

Matud pa niya nga sa miaging tuig, kapin 1.5 milyon ka mga tawo ang nanan-aw sa maong tinuig nga kalihokan mas daghan karong tuiga kay matud pa nianang pagka-alas 6 na kagabii kalit nga midagsa ang mga tawo.

Ang Sinulog karong tuiga maoy gihulagway nga kinaestriktohan sa tanang nangaging mga Sinulog tungod sa gipatumang ordinansa nga nagdili sa mga street parties ug ang pag-inom og ilimnong makahubog sulod sa 300 meter radius gikan sa grand parade.

Nianang adlawan pa, nabantayan nga menus ra kaayo ang gidaghanon sa mga tawong nanan-aw tungod sa panahon.

“Ang pag-ulan-ulan nakahatag usab og pagkunhod kay ang uban man gud kung mag-uwan unya wala sila’y payong, they have to stay somewhere covered,” si Tolentin miingon. Apan pagdagan sa mga oras, hinayhinay og kawagtang ang pagtaligsik ug kagabii sa dayon nang pagkilom-kilom nidagsa ang mga tawo ilabi na kadtong gustong motan-aw sa fireworks display human sa grand finale sa presentasyon diha sa Cebu City Sports Center.

Giangkon usab ni Tolentin nga aduna gihapon sila’y nasugatang problema sa pagkontrolar sa mga tawo bisan sa kadaghan sa mga gi-deploy nga mga polis ug force multipliers.

Ang pagputol sa signal sa mga cell sites daw way epekto sa mga nanan-aw gawas lamang sa pipila.

“Daghan ming pagpanaway nga nadawat regarding aning signal shutdown but di namo pwede ibaylo ang pagpanaway sa safety sa Sinulog as long as the people are safe,” si Tolentin miingon. (BANAT NEWS)