Ang Babae sa Silong (7)

Napalingon si Dado nang marinig na may nagbukas ng pinto sa ku­war­tong pinauupahan sa silong.

Nakita niya na may luma­bas na lalaki. Sa tantiya niya ay mga 22 o 25-anyos ang lalaki. Guwapo. Katamtaman ang pangangatawan. Naka-pantalong maong at t-shirt.

Agad niyang binawi ang pagkakatingin at baka isiping tinitingnan niya ito.

Naisip ni Dado na baka asawa ng babae ang lala­king lumabas. Pero sa tingin niya ay bata pa ang lalaki para maging asawa ng ba­baing nangungupahan na ayon kay Manang Oya ay Gab ang pangalan. Sa tingin niya sa babae o kay Gab ay mga mahigit nang 30 anyos. Baka hindi nagkakahuli ang edad nila.

Pero naisip din naman ni Dado na hindi na kataka-taka ngayon kung mayroong nagkakaasawahan na mas matanda ang babae kaysa lalaki.

Nagpatuloy sa paglala­kad si Dado patungo sa sa­kayan ng dyipni sa España Blvd. Hindi siya nagmamadali sa paglalakad sa­pagkat ma­rami pa siyang oras. Matra­pik man siya sa España, ma­­­kakarating pa rin siya sa tamang oras sa kanyang opi­sina sa Port Area.

Isang dyipning may signboard na Quiapo-Pier ang nakita niya. Pinara niya.

Nang makasakay na siya, naisip na naman niya ang tungkol sa babaing nangu­ngupahan sa silong.

Hindi niya alam kung bakit interesado siyang ma­laman ang buhay ng babae. Nagiging tsismoso na ba siya?

Napangiti si Dado. Siguro’y dahil sa naghahanap lang siya nang mapagbabalingan ng pansin dahil paulit-ulit na lang ang mga gina­gawa niya sa araw-araw.

At ngayong may na­kita na siyang lalaking lumabas sa kuwarto sa silong, parang lalong nadagdagan ang kanyang kuryusidad na su­baybayan ang buhay ng babaing nangungupahan.

Ano nga kaya ng babae – ni Gab – ang lalaking lumabas sa ka­nina? Asawa kaya?

(Itutuloy)