Ahas sa Garden (395)
SA pag-iisa ni Nicole sa kanyang inuupahang bahay, madalas ay malalim siyang nag-iisip. Isa sa mga iniisip niya ay ang sinabi ni Nina tungkol kay Mang Alexis. Sabi ni Nina, maaaring may gusto o lihim na pagmamahal sa kanya si Alexis dahil sa ipinakikita nitong kabutihan. Ayon kay Nina ang pagpapakita ng kabutihan ay isang indikasyon na may lihim na pagmamahal.
Napangiti si Nicole. Totoo kaya ang mga sinabi ni Nina o iyon ay sarili lang niyang opinyon. Baka naman hindi totoo ang sinabi niya.
Pero mula nang “kupkupin” siya ni Mang Alexis, marami na ngang pagkakataon na nagpakita ng kabaitan si Mang Alexis.
Halimbawa ay ang pagbibigay sa kanya ng backpack na kailangan daw niya sa pag-aaral.
Isa pang halimbawa ay ang kutson ng kama na dinala pa mismo rito sa inuupahan niyang bahay. Kailangan daw niya ang kutson para hindi masaktan sa pagtulog.
At ang pinakamalaking tulong ni Mang Alexis sa kanya: binigyan siya ng pang-tuition para maipagpatuloy ang pag-aaral. Ito ang itinuturing niyang pinakamalaking tulong na mag-aakyat sa kanya para guminhawa ang buhay.
Kaya hindi niya bibiguin si Mang Alexis, mas lalo pa siyang mag-aaral para makapagtapos nang may karangalan. Paghuhusayan pa niya para masulit ang tulong ni Mang Alexis.
(Itutuloy)
- Latest