Sadiq (71)
PAGDATING nila sa bahay, inihanda ni Sadiq ang kakainin nila ni Gina para sa tanghalian. Nasa school ang tatlo nilang anak. Nagsaing at ipinainit niya ang mga ulam. Si Gina sana ang gagawa ng mga iyon pero pinigilan siya ni Sadiq.
“Huwag ka nang kumilos, Mommy. Maupo ka na lang at magpahinga. Ako ang bahala rito. Kayang-kaya ko ang mga ito.’’
“Kawawa ka naman, Daddy. Tutulungan kita!’’
“Huwag na. Kaya ko ito. Manood ka na lang ng TV.’’
Ipinagpatuloy ni Sadiq ang pagluluto. Habang nagluluto, maliksi niyang kinuha ang mga maruruming damit sa kuwarto ng mga anak at pati sa kanilang kuwarto. Inilagay ang mga iyon sa washing machine. Kaya habang nagluluto siya, naglalaba na rin. Eksaktong tapos ang pagluluto, matatapos na rin siya sa paglalaba.
Nang maluto ang kanin at ulam, kumain silang mag-asawa. Masaya silang nagkukuwentuhan habang kumakain.
“Ang sarap mong magluto, Daddy. Nagluluto ka ba sa Saudi?’’
“Hindi.”
“Ba’t ang sarap mong magluto?’’
“Diskarte lang yan. At saka mabilis namang iluto ang bistik.’’
“Sabagay. Pero ang sarap ng luto mo talaga.’’
“Salamat. Bukas, paksiw na bangus naman ang iluto ko at saka monggo.’’
“Sige masarap yun Daddy.’’
Pagkatapos kumain nagsampay ng damit si Sadiq. Nakaalalay naman si Gina sa kanya. Naaawa si Gina dahil ang dati niyang trabaho ay ang asawa na ang gumagawa.
(Itutuloy)
- Latest