Huhungihong sa kagutom
Pasayloa nga wa nay namakpak sa labing uwahing pasidaan sa Malacañang batok sa mga motago ug momaniobra sa presyo sa bugas humay ug ubang mga produkto sa agrikultura samtang nagkapupos nang El Niño ug nagsingabot nang La Niña. Kay samtang abunda ang pangisog, nihit ang nasilotan.
Ambot duna na bay nadakpan ug nakiha sa gipasanginlan nga smugglers ug hoarders. Pero, bisan sa kadaghan sa mga ronda nga gipasiugdahan ug sa mas daghan nga mga negosyante nga gipasanginlan, wa pa tay nahibaw-an nga dunay aktuwal nga nabalhog sa prisohan ug nasilotan.
***
Ang labing uwahing pasidaan giluwatan ni Defense Secretary Gibo Teodoro, ang hepe sa Task Force El Niño, atol sa ilang tigom sa Kampo Aguinaldo karong buwana. Nidason sa paasidaan ni Presidente Ferdinand Marcos Jr. atol sa State of the Nation Address (SONA) napulo ka buwan nang nilabay nga inihap na lang ang mga adlaw sa smugglers ug hoarders.
Padayon tang mag-ihap sa mga adlaw kanus-a tinud-on nilang Marcos ug Teodoro ang mga pasidaan. Sa kasamtangan, mga sakop sa Kongreso abunda og mga ngan nga gipasanginlang nisabotahe sa nasudnong ekonomiya.
***
Hinaot nga ang kapakyas sa pagpriso ug pagsilot sa smugglers ug hoarders wa manukad sa pasangil sa usa sa mga kongresista nga alyado sa administrasyon nga ang utok sa smuggling mao ang kasosyo sa negosyo sa bayaw sa presidente.
Imbes mapapas nisamot ang pagduda dihang nangangkon si First Lady Liza Araneta Marcos nga ang iyang manghod nga si Martin Araneta ug ang kasosyo nga si Michael Ma maoy naggasto sa ilang kampanya sa eleksiyong presidensiyal sa 2022.
***
Nagpabiling taas ang presyo sa bugas humay bisan sa price control nga pataka nga gipahamtang ni Marcos niadtong Septiyembre sa niaging tuig. Nisamot kalayo ang aktuwal nga presyo sa mas dakong pataka ni Marcos nga mo-us-os ngadto sa ?20 kada kilo atol sa iyang administrasyon.
Pero wa sila magnihit og mga lusot sa kapakyas pagbungkag sa rice cartel ug ubang sindikato: Ibalik nilang gahom sa National Food Authority (NFA) pag-import ug pagbaligya og bugas humay nga gikabalak-ang makapabanhaw sa, nakatag-an ka, karaang sindikato sa NFA; ug pagkumbinser sa katawhan nga huhungihong ra ang ilang kakabos ug kagutom.
- Latest
