Kon may milagro

Kon hikapon sa kaluoy ang kasingkasing sa mga opisyal sa gobyerno ug ibanan og ?100 bilyones ang ilang kawaton karong tuiga (sa banabana sa World Bank, kurakuton ang 20% o ?1.2 trilyones sa ?5.8 trilyones nga budget sa 2024):

•Makatukod ang Department of Education ug Department of Public Works and Highways og igong gidaghanon sa classrooms aron di na maghuot ang mga estudyante sa public schools; ug

•Kon padayong gahinan og ?100 bilyones sa mosunod nga katuigan hangtod sa 2030, hingpit nang masulbad ang kanihit sa classrooms sa tibuok nasud.

***

Kon tandugon ang konsiyensiya sa mas daghang opisyal ug ibanan og laing ?170 bilyones ang kawaton karong tuiga, mapatuman nang Universal Health Care Law (nagkinahanglan og ?270 bilyones kada tuig pero ?100 bilyones ray mahatag sa PAGCOR ug PCSO):

•Tanang Pilipino mahimong sakop ug makadawat sa mga benepisyo sa Philippine Health Insurance Corp.; ug

•Tanang pasyente makadawat sa batakang mga benepisyo, sama sa libreng doktor, libreng tambal, ug libreng ospital.

***

Kon makaamgo ang kinabag-an sa mga opisyal sa gobyerno nga mas makaayo sa mas daghan kon ibanan ang kuwarta nga pasimangon sa ilang pribadong mga bolsa karong tuiga, matubag ang dugay nang napasagdan nga labing dinalian nga mga panginahanglan:

•Makaangkon nang Department of Budget and Management og dugang ?14 bilyones aron ma-hire ang 30,000 ka bag-ong magtutudlo kada tuig;

•Mabalik sa Department of Health ang gilaslas nga binilyon ka pesos para sa pagtukod og dugang mga ospital ug pagpamalit og dugang mga tambal; ug

•Mahatagan ang Department of Agriculture og pundo para sa support services sa mga mag-uuma aron mapalambo ang produksiyon ug maibanan ang importasyon sa bugas humay ug ubang mga produkto sa agrikultura.

***

Kon hingpit nga milagruhan ug way mangawat karong tuiga, ang administrasyon ni Presidente Ferdinand Marcos Jr. di na kinahanglan nga magkara-kara og pangutang og ?4 bilyones kada adlaw para sa tanang gastohan sa gobyerno.

Ug kon matakdan sa milagro ang Malacañang ug makumbinser paglaslas sa wa kinahanglana nga mga lakwatsa karong tuiga, mahimong di nang kaabot og ?14 bilyones ang gasto kada adlaw, mas maayo ganing itakdo na lang sa ?10 bilyones nga inadlaw nga kita.