Paglugway sa pailob sa WPS
Nagpatrolya nang mga barko ug mga ayroplano sa Pilipinas ug Estados Unidos sa West Philippine Sea (WPS) niadtong Nobyembre 21, 22, ug 23. Nga gisundan dayon sa patrolya sa mga barko ug mga ayroplano sa Pilipinas ug Australia sa WPS niadtong Nobyembre 25, 26, ug 27.
Pero gahapon, Sabado, gihasi gihapon og water cannons sa mga barko sa Chinese Coast Guard ug maritime militia ang barko sa Bureau of Fisheries and Aquatic Resources (BFAR) sa Pilipinas nga nanghatag og ayuda sa mga mangingisda sa Scarborough Shoal duol sa kadagatan sa Zambales.
***
Ang insidente gahapon napuno sa nagkataas nga listahan sa nagkagrabe nga pagpanghasi sa China sa WPS karong tuiga:
•Pagpuntirya sa barko sa Chinese Coast Guard og military-grade nga laser ngadto sa barko sa Philippine Coast Guard nga naghimo og resupply mission sa Ayungin Shoal niadtong Pebrero 6;
•Pagbangga sa barko sa Chinese Coast Guard sa barko nga gikontrata sa Armed Forces of the Philippines (AFP) para sa resupply mission sa Ayungin Shoal niadtong Oktubre 22; ug
•Pagbombardiyo og water cannon sa barko sa Chinese Coast Guard sa barko nga gikontrata sa AFP sa Ayungin Shoal niadtong Nobyembre 10.
***
May sukaranan ang mga pangutana:
•Kutob ba lang sa patrolya ang mahimo sa Pilipinas, Estados Unidos, Australia, ug ubang kanasuran nga nisupak sa pag-angkon sa China sa tibuok South China Sea?; ug
•Kutob ba lang sa diplomatic protests ang Department of Foreign Affairs (DFA) sa Pilipinas sa matag higayon nga, babagan, banggaan, o i-water cannon ang mga barko sa PCG ug BFAR sa WPS?
***
Gipanalipdan sa DFA ang ka-epektibo sa diplomatic protests bisan niangkon ang PCG nga mas daling nitubag ang China sa ilang pagpahibawo sa publiko sa mga detalye sa mga pagpanghasi. Matod sa DFA ang makanunayon nga diplomatic protests apil sa nakapadaog sa Pilipinas batok sa China sa Permanent Court of Arbitration niadtong 2016.
Ang diplomatic protests mao say pagmatuod sa Pilipinas nga pabiling nisalig nga mahusay ang panagsungi sa WPS pinaagi sa diplomatikanhon ug malinawon nga mga paagi. Pero kon madugangan ang ka-agresibo sa panghasi sa China, hangtod kanus-a ang pailob sa Pilipinas ug alyadong mga nasud?
- Latest
