Kinsay nahipos sa WPS

Naklaro atol sa tulo ka adlaw nga joint patrols sa West Philippine Sea (WPS) sa mga barko ug mga ayroplano sa Pilipinas ug Estados Unidos nga ang China mahipos ug magpalayo diay kon dunay makapakita nila og mas dakong braso.

Atol sa ikaduhang adlaw sa patrolya niadtong Miyerkules, nakit-an sa mga tripulante sa joint patrols ang pipila ka barko ug usa ka ayroplano sa China nga nahimutang sud sa WPS. Sa ato pa, bantang nga nilapas sa nasudnong teritoryo sa Pilipinas. Pero way bisan usa nga nangahas sa pagpanghilabot nila.

* * *

Gani, ang kinadul-ang barko sa China nagpaantaw lang sa gilay-on nga walo ka kilometro gikan sa tulo ka barko sa Philippine Navy ug sa littoral combat ship (LCS) sa US Navy. Wa igkita ang naandan nga dagkong panon sa China Coast Guard vessels ug maritime militia vessels.

Way peligruso nga pagbabag sa agianan sa patrolya. Way hulga sa water cannons ug military-grade laser. Nahilom ang agresibong radio challenges gikan sa China nga silay tag-iya sa Ayungin Shoal ug ubang features sa WPS. Ang kasalbahis sa China ipakita lang batok sa kabos natong mga mangingisda ug mga sakop sa Philippine Coast Guard (PCG) nga way ikasukol nila.

* * *

Mga timaan nagpakita nga wa kaandam ang China nga ang joint patrols sa WPS, nga gipahibawo sa Pilipinas ug Estados Unidos sayo ning tuiga, mahinayon karong semanaha. Wa tingali magpaabot nga mahimo pila lang ka semana human sa ilang pagbangga sa duha nato ka barko sa resupply mission sa Ayungin sa niaging buwan.

Wa gani makapagawas ang China sa ilang naandan nga panghudlat ug panginsulto batok ni bisan kinsang mangahas sa paghagit sa ilang pangangkon sa tibuok South China Sea, nga kabahin ang WPS.

* * *

Sa pagpakugang sa China, napamatud-an ni US President Joe Biden nga di istorya lang ang ilang pagtabang sa Pilipinas. Nga bisan nagkadungan ang gubat sa Ukraine ug Russia ug sa Israel ug Hamas, napasundayag ang ilang puwersa sa WPS.

Samtang ang US Navy P-8 Poseidon nakahimo og upat ka oras nga aerial surveillance atol sa patrolya sa WPS. Ug nakahipos og abundang kasayuran sa mga armas ug gidudahang submarino sa China.