Pagkabisto sa sekretong lag
Naabtan ang Malakanyang og 24 oras una niangkon nga nibiyahe si Presidente Ferdinand Marcos Jr. sa Singapore niadtong Sabado ug Dominggo.
Naabtan ang administrasyon og upat ka adlaw una nikumpisal nga ang labing luho nga ayroplano sa Philippine Air Force (PAF) P2 bilyones nga Gulfstream G280 ang gisakyan sa presidente ug sa iyang pamilya Unang Ginang Liza Araneta Marcos, Kongresista Sandro Marcos (nga nagtangkil og babayeng artista) ug ig-agawng si House Speaker Martin Romualdez (kuyog ang Sugbuanong asawa, si Kongresista Yedda Marie Kittilstvedt-Romualdez) pagtan-aw sa lumba sa sakyanan sa Singapore.
* * *
Nihit ang mga detalye ni kanhi Press Secretary Trixie Cruz-Angeles sa laag sa presidente. Tingali nahibawo nga inihap nang iyang mga oras sa palasyo. O, sama sa ubang opisyal sa Malakanyang, wa sab kahibawo unsay tuyo sa biyahe.
Laing niangkon nga way kasayuran mao si Executive Secretary Lucas Bersamin. Kinsa mao gyod unta ang suhito sa tanang lakaw sa presidente. Mahimong wa pa saligi ang bag-o pang natudlo nga si Bersamin. Kinsa mahimong nagapos sa pagsegurong di na kahilabot sa Malakanyang silang Angeles ug di diay chief of staff Victor Rodriguez.
* * *
Ambot pila na sab ka adlaw ang atong paabuton una ipahibawo sa administrasyon unsay kapuslanan sa pagtan-aw sa Formula One sa mga paningkamot pagpalambo sa nasudnong ekonomiya, pagpabarug sa mga biktima sa bagyong Karding ug pagtabang sa mga labing naapiki sa pagsulbong sa presyo sa palaliton.
Pananglitan, unsa may bag-ong mga puhonan nga gisaad nga ibubo sa Pilipinas atol sa way kahumanan nilang kaon ug inom sa F1 Paddock Club sa Singapore?
* * *
Gipasabot sa PAF nga ang Gulfstream G280 usa ka “command and control” nga ayoplano nga nihatag sa presidente sa katakos sa pagduma sa nasud bisan naglupad sa kahanginan. Wa hinuoy klaro unsang kalihokan ang iyang giduma samtang nagpa-uraray sa luho nga flight.
Ang klaro maong gasto sa flight: P1.8 milyones. Ang klaro maong gidaghanon sa polusyon (carbon footprint) nga gibugwak sa jet: 23 ka tonelada. Ug ang presidente nga bag-o lang niawhag pagbatok sa climate change sa iyang diskurso sa United Nations angayng pahinumdoman sa tinuig nga carbon footprint sa iyang paboritong F1: Kapin sa duha ka milyon ka tonelada.
- Latest
![](https://www.philstar.com/images/stand-in-photo-male.jpg)
![](https://www.philstar.com/images/stand-in-photo-male.jpg)