Makalilisang nga mga timaan
Samtang tak-om ang Malacañang sud sa pila ka adlaw sa pagtan-aw ni Presidente Ferdinand Marcos Jr. og lumba sa mga sakyanan sa Singapore sa niaging weekend, abunda ang kasayuran gikan sa Singapore:
• Si Singaporean Prime Minister Lee Sien Long ni-post sa iyang letrato sa Singapore Grand Prix uban nilang Presidente Marcos Jr. ug sa iyang asawang si Liza Araneta Marcos; ug
• Ang opisyal nga website si Singapore Grand Prix ni-post sa letrato sa anak sa presidente nga si Kongresista Sandro Marcos nga nagkataw-anay uban sa artista nga si Alexa Miro.
* * *
Ginganlan ni Singapore Minister for Manpower Tan See Leng ang mga opisyal nga gikaabot ni Marcos Jr. sa Singapore Grand Prix: President Surangel Whipps Jr. sa Palau; Keo Rottanak, kaabag sa primero ministro sa Cambodia; Cambodia Minister of Commerce Pan Sorasak; ug Dr. Fahad Bin Abdullah Toonsi, Advisor sa Royal Court sa Saudi Arabia.
Ang post ni Tan sa Facebook maoy gibasehan sa Malacañang sa pagdeklarar nga mabungahon ang pagduaw sa Singapore ni Presidente Marcos Jr., iyang ikaduha sud sa tulo ka semana. Napakyas hinuon pag-detalye unsay kapuslanan sa biyahe.
* * *
Mga letrato ni Marcos Jr. sud sa eksklusibong F1 Paddock Club nga nag-umbaw sa garahe ug lumbaanan sa mga sakyanan nipahimutang niya sa lamesa nga may marka nga “Table 10” ug ngan nga “Jaya Sudhir.”
Abtik ang netizens nga nidangop sa Google. Mao ni ilang nahibaw-an: Si Jaya Sudhir, nga nailhan sab nga Jaya Sudhir Al Jayaram, usa ka negosyante sa Malaysia nga nadakpan nga nisuway pag-smuggle og kuwarta pagawas sa Sri Lanka niadtong 2018.
* * *
May sukaranan ang panghinaot sa pipila nga kiat lang si Presidente Marcos Jr. Nga di lang kapugong sa katol sa iyang tiil sa paglaag. Nga gimingaw lang sa mga adlaw sa diktadura nga ilang makuha ang tanan nilang gusto ug maabot ang tanang gustong adtuon.
Pero may sukaranan sab ang ilang kahadlok nga di inosente ang iyang mga lakaw. Nga ang lokal nga mga kuyog-baboy nga nagsige og ulug-ulog niya ug ang mga langyaw nga iyang gikatagbo bisan asa maoy mga timaan unsay mahitabo sa mosunod nga unom ka tuig: Way kinutobang pag-abuso sa gahom ug pagtilok sa nasudnong panudlanan.
- Latest
