Presidente sa tugpahanan
ARANGKADA - Leo Lastimosa (The Freeman) - May 31, 2016 - 12:00am

Hinaot nga may makahunghong ni President-elect Rodrigo Duterte nga di tinuod nga may mga ungo sa Malakanyang, o kon duna man di sila mas kahadlokan kay sa mga durugista ug ubang bangis nga mga kriminal nga kada adlaw ug gabii niyang gihudlat, o nga maanad dayon siya sa pagpuyo sa palasyo.

Kay di magsilbing plano nga matag adlaw siyang molupad gikan ug paingon sa Davao City ug Metro Manila. Mga Bol-anong nagtrabaho sa Sugbo mosulti niyang di mahimong kada gabii silang mopauli sa Bohol ug kada buntag nga molawig balik sa Sugbo. Samtang taga Luzon nga nagtrabaho sa Metro Manila motug-an niyang dul-an sa walo ka oras silang matanggong sa trapiko.

***

Bisan kinsang mobiyahe sa ayroplano mopasabot niya nga mas dako ang panahon nga maggasto sa pagsud-gawas sa mga tugpahanan ug paghuwat sa flights. Mao nga kon kada adlaw niyang latason ang kaulohan ug habagatang Mindanao ang labing dakong bahin sa unom ka tuig niyang pamunoan mahurot sa pagbiyahe gikan ug padung sa Malakanyang ug sa iyang pinuy-anan.

Wa tingaling kasinati si Duterte sa kahasol sa mga tugpahanan kay pribadong mga ayroplano nilang Pastor Apollo Quiboloy ug ubang mga higala ang gisakyan pagpangampanya. Kay himuon na mang presidential plane nga air ambulance sa Philippine Air Force ug kay di man mahimong kada adlaw'ng mag-pribadong ayroplano, makatilaw gyod tingali sa kalbaryo sa commercial flights.

***

Apan presidente na si Duterte. Di siya sama nato nga mahimong mabiyaan sa flights kay segurong huwaton gyod sa mga tripulante. Apan may mahimo ba kon malangay o makanselar ang flights tungod sa depekto sa mga ayroplano o kahuot sa mga tugpahanan?

Lahi nato, mahimong di siya matanggong sa trapiko sa kadalanan. Apan nisaad nga di siya moggamit sa No. "1" nga license plates. Nagpasabot ba nga ibalik niya ang wang-wang? O masaligon lang gyod nga masulbad dayon niyang trapiko sa di pang tulo o unom ka buwan nga iyang ultimatum sa bangis nga mga krimen?

***

Sa pikas nga bahin, mahimong nagkinahanglan ta og presidente nga makasinati sa kahasol sa pagbiyahe ug pagkatanggong sa trapiko matag adlaw aron nga matugkad unsay pag-antos sa kinabag-an sa katawhan. Sa ingon masulbad sa labing daling panahon ang krisis sa trapiko nga nakapa-alkanse na sa nasudnong ekonomiya og binilyon ka pesos.

Apan ang trapiko usa lang sa daghan uyamot nga mga suliran sa nasud. Kinahanglang palingkawason ang presidente gikan sa gapos sa trapiko aron nga gawasnong motutok sa mas dagko ug mas dinaliang mga panginahanglan sa katawhan. Nisaad si Duterte og dagkong kausaban. Tingali ang di kasarangan niyang mga lakang kabahin na sa pag-andam sa katawhan sa mas makahuloganong kausaban. Hinaot pa unta.

 

CHAIRMAN NUR MISUARI MNLF MORO NATIONAL LIBERATION FRONT RODRIGO DUTERTE ZAMBOANGA SIEGE
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with