^

Gabayan ko si Senyor Santo Niño

Fred Fuentes Monternel - Cebu City (The Freeman) - January 20, 2014 - 12:00am

Atubangan sa imahen ni Senyor Santo Niño, mihalok si Tony niini. Unya, midalikyat siya’g luhod nga mipadaplin og diyutay sa agianan sa daghang mga debotos nga manghalok sab sa imahen sa Balaang Bata, atol ning adlaw sa iyang kapistahan dinhi sa siyudad sa Sugbo. Mikibot ang baba ni Tony.

“Senyor Santo Niño, sa kanunay ikaw ang akong gabayan sa nakab-ot kong kaharuhay og kahimtang karon! Salamat Senyor Santo Niño sa mga grasya nga gipabuhagay mo paghatag kanako uban sa akong pamilya! Oo, ikaw ang akong gabayan sa nakab-ot kong kalampusan sa paglambo sa akong negosyo, maoy hinungdan nga matag Pista Senyor ug matag Sinulog, bongga gayud ang himuon kong hikay, nga akong ihalad kanimo ug akong paambitan sa tanan kong kahigalaan ug kasilinganan...!”

Kanhi, hilabihan nga pagkagumon ni Tony sa lainlaing bisyo. Sa sugal sa bulangan, sa pagkahimabaye ug sa pagkagumon sa ginadiling druga, ilabi na ang paghithit og shabu. Nabungkag ang iyang pamilya uban sa iyang asawa ug duha ka mga anak. Napurdoy ang gipadagan niyang negosyo nga five-six sa tibuok merkado publiko sa siyudad sa Sugbo. Ang dako niyang lending firm sa dalan Colon nga iyang gidumala, nabangkarota. Tungod sa daotan niyang bisyo, gibulagan siya sa iyang asawa nga usa ka eligible nga maestra sa publikong elementaryang eskuylahan. Nahimong rabanit nga estambay si Tony. Unya, dihay kalit kahimatngon nga mituhop sa iyang kaugalingon. Kanunay siyang gipadamgo ni Senyor Santo Niño nga may panahon pa sa pagbag-o sa kinabuhi. Busa, nagpakiluoy si Tony sa iyang asawa ug mga anak. Gipasaylo si Tony sa iyang asawa ug nahimo niyang deboto ang imahen ni Senyor Santo Niño. Nahimo niyang gabayan si Senyor Santo Niño sa iyang pagbangon ug pagbag-o na sa kinabuhi. Paglabay sa katuigan, paspas nga mibalik paglambo ang negosyo ni Tony nga five-six ug lending firm. Nakapamalit siya’g kayutaan ug nakapatukod og daghang apartment ug balay paabangan. Nakapalit usab siya og daghang dyip-pasaheroan ug mga unit sa taksi nga nagdagan sa siyudad. May bag-o na usab siyang puting Toyota Fortuner nga serbis nga sakyanan. Ug bag-o lang usab nahuman ang gipatukod niyang moderno ug desenteng tres-andanang panimalay sa ilang dapit sa Banawa.

“Senyor Santo Niño, ikaw ang akong gabayan....!” mao kini ang kanunay ituaw ni Tony sa iyang galamhan sa nakab-ot niyang kaharuhay sa kinabuhi.

Ug ning adlaw karon sa kapistahan ni Senyor Santo Niño, bongga na sab ang giandam nga hikay ni Tony sa bag-o niyang panimalay nga iyang itagana ug ipakaon sa tanan niyang kahigalaan ug kasilinganan. Napulo ka dagkong litsong baboy ug tulo ka litsong baka ang iyang ipakaon sa tanan ning adlaw sa Pista Senyor, uban ang nagkayeng beer ug binong ilimnon.

Nagdaling migula si Tony sa simbahan sa Basilica Minore, human makahalok sa imahen ni Senyor Santo Niño. Gidumdom niya ang giparkingan sa iyang Toyota Fortuner nga halayo sa Basilica Minore. Mouliot karon siya pagsubay sa dalan nga wa mahiapil sa rota sa Sinulog ug mopauli dayon sa ilang balay sa Banawa, aron makigsalo sa tanang mga bisita nga naghulat kaniya ning buntaga, uban sa iyang asawa ug mga anak. Samtang nagpadulong sa giparking niyang sakyanan, nakatuaw na usab si Tony sa tumang kalipay.

“Ikaw ang akong gabayan Senyor Santo Niño! Pit Senyor! Viva Senyor Santo Niño...!” (Kataposan)

IYANG NIYANG PLUSMN SANTO SENYOR SENYOR SANTO NI TONY
  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with