Wildcard Winner, taga Carmen!

CEBU, Philippines — Kumpleto na ang grand finalists sa Sinulog Idol Season 14 human nga ang pambato sa Carmen, Cebu nga si Raffy “Raf”Buenconsejo nagmalapuson nga nakasugakod sa labing una nga "Fight for Your Right" wildcard round nga nahitabo sa Fuente Osmeña Circle sa Dakbayan sa Sugbo niadtong Miyerkules, Enero 11, 2023.

Human nga lakip sa nataktak niadtong Martes, gipamatud-an ni Raffy nga aduna siyay luna alang sa grand finals sa maong prestihiyosong kompetisyon. Subli nga giawit ni Raffy ang of "Impossible" ni James Arthur nga mao ang awit nga nakapataktak niya.

Sa laing higayon nga gihatag kaniya, ang maong kanta sab ang naghimo kaniyang “Star of the Night”.

Lakip na si Raffy sa panon nila ni Johnel “Nel” Bucog, Mary Therese Jade “Tere” Damos, Doreen “Dee”Geralla, Jovie “Jov” Loon, ug Maxell “Max” Muldez isip Grand finalist sa ika-14 nga hugna sa Sinulog Idol. Silang unom mao ang magtigi alang sa titulo nga Sinulog Idol 14 Grand Champion.  Ang mga nalakip sa wildcard nga nakatigi ni Raffy nga sila si Marianne Mae Shannen “Shan” Garciso, Jaienne Braveree “Brave” Suralta, Chriszandra “Zandra” Pateres, Yeza Karyl Mayol, Dominic “Doms” Quibido ug Hidle Lyn “Hides” Resurreccion, pareho nga miingon nga bisan pa man og hingpit nga natapos ang ilang pakigsangka sa kompetisyon, pabilin sila nga mapasalamaton nga nalakip sa subli mga pagpahigayon sa Sinulog Idol ug gani, pabilin sab nila nga bawnon ang mga pagtulun-an nga ilang naangkon nga gihatag kanila sa mga mentors ug mga nagpaluyo sa kompetisyon nga makapahimo nila nga professional nga mga talents sa Sugbo.