Gazini, nahimamat na ang amahan

CEBU, Philippines — Daghang nalipay alang kang Miss Universe Philippines Gazini Ganados gumikan kay nahimamat na gyud niya ang iyang amahan sa labing unang higayon.

Wala ilimod ni Ganados nga usa sa mga rason nganong niapil siya og beauty pageants, ilabi na nasudnong mga indigo, mao nga namasin siya nga makit-an niya ang iyang amahan nga Palentino nga wala pa gyud niya makita masukad. Ug sa iyang IG account niadtong Biyernes sa gabii, malipayon nga gipahibawo ni Gazini nga nag-date na gyud sila sa iyang amahan sa usa ka pizza parlor sanglit sa susamang dapit usab nag-date ang iyang mga ginikanan 30 ka tuig na ang nilabay.

Wala gidetalye pa ni Gazini unsa nga pagkahitaboa nga nahimamat na niya ang iyang amahan apan giisip niya kini nga maanindot nga gasa sa pagsulod na sa bag-ong tuig. Wala sab niya gisulti diin kini mahitabo, apan may miingon nga dinhi sa Sugbo kini gipahigayon.

Megan ug Mikael, kasado na!

Gikasal na ang longtime showbiz couple nga sila si kanhi Miss World Megan Young ug TV host/model/ actor nga si Mikael Daez.

Gipahigayon ang intimate wedding kagahapon sa hapon didto sa Subic, Zambales nga gitambungan sa ilang tagsa-tagsa ka pamilya. Sa mga hulagway nga nigawas online makita nga malipayon ang duruha—naghagwaay pa.

Kahinumduman nga 2017 dihang giangkon ni Mikael nga unom ka tuig na silang magkarelasyon ni Megan niadtong tungora. Sa nilabay nga tuig, daan na nga namahayag ang bag-ong magtiayon nga maghilom ra gyud sila kabahin sa mga detalye sa kasal.

Dakong bakak!

Hugtanong gihimakan ni Issa Pressman ang balita nga nagtumbok kaniya nga hinungdan sa gikatahong panagbulag nila ni Nadine Lustre ug James Reid sa nilabay nga semana. Sa Intagram, nagkanayon si Issa nga sayod siya nga bisa’g-unsa pay iyang isulti, duna gyud gihapoy dili maayo nga reaksyon ang mga tawo, apan matud pa niya, iya lang gyud nga klarohon nga ang nigawas nga istorya kay “it’s 100% false”, hinungdan nga angayan na matud pa nga mag-move on.

May project sa Japan!

Viva artist na si Xia Vigor, ang child star nga gihangop sa kadaghanan human sa maayo niyang performance sa top-grossing movie “Miracle in Cell No.7” nga tipik sa Metro Manila Film Festival sa nilabay nga bulan. Nipirma og  management contract si Xia niadtong Biyernes sa gabii, diin nasayran nga may offer nga project alang niya ang Fuji TV nga nagbase sa nasud sa Japan.