Assembly Language Connection

CEBU, Philippines — Dili gyud sayon ang pagmugna og kanta apan gumikan sa ilang panaghigalaay, napasayon kini himo kini nga dali tungod kay ang mga gihunahuna nga mga ideya nagkahiusa man.

Mao kini ang sekreto ngano nga dali nga namugna ang kanta nga 'Chinita', 'Tabang' ug uban pa nga gipasikat sa banda nga Assembly Language.

Ang maong banda naumol niadtong 2006. Gani, ang pangalan sa banda naggikan kini sa ilang gisudlan nga klase nga Assembly Language nga usa ka subject sa kurso nga Computer Engineering didto sa Cebu Institute of Technology-University.

Gilangkoban ang maong banda kaniadto nila ni Nahsh Maquiling, Emping Kiskisan Jr., Zen Go, ug John Alfred "Janjan" Bajana. Sa bag-ohay pa lang ang banda, dali kini nga nahimong ilado sa kadaghanan human nga nadungog sa radyo ang kanta nga 'Chinita'.

"Una nga kanta nga misikat namo kay ang 'Tabang'. Unya nisunod ang 'Chinita'. Didto gyud ni boom og maayo ang among banda kay bisan pa og nagpractice lang mi nga wala mi ligo, giduol lang mi og mga reporter kay interviewhon mi", asoy pa ni Nahsh atol sa pagpakighinabi niini sa  Banat News Hugyaw

Ang kanta nga 'Chinita' nagtuki sa gikaibgan sa usa ka miyembro sa grupo nga si Emping.

"Para nako, ang kanta kay nindot gyud siya mao nga ako gyud siya nga gi-submit sa radio stations kay sa among grupo, ako ra man ang taga-syudad", suma pa niya.

Matud pa ni Nahsh nga wala gyud siya magduha-duha sa pagsumite sa ilang kanta tungod kay dako ang iyang pagtuo nga daghan ang makauyon sa ilang awit.

Dugang pa ni Nahsh nga nakakuha siya og ideya nga mosumite og mga kanta sa mga estasyunan sa radyo gumikan kay ang iyang amahan kaniadto tigkantahan sa mga estasyunan diri sa Sugbo.

"Akong papa tigkantahan na siya , niya malingaw gyud mi sa akong pamilya nga makadungog niya mokanta. Nakaingon gud ko ato nga kung naa koy kanta, ganahan ko madungog sa radyo", asoy pa ni Nahsh.

Ug niadtong kolehiyo na siya, nahitabo na gyud ang iyang hagbay lang nga gipangandoy. Wala niya damha nga mosikat pa gyud kini tungod kay niadtong mga panahuna, dili pa kaayo dawat dinhi ang mga binisaya nga kanta ilabi na ang rock nga genre.

Apan gumikan kay mamugnaon siya nga pagkatawo ug ang iyang mga kauban sa grupo, gihimo niya ang maong kanta nga aduna gihapo'y melodiya kun diin makasabay ang mga tawo sa panahon nga ipasundayag kini nila sa kinabag-an.

Tungod sa maong kanta, napili ang banda isip 'Bisrock Pop of the Year' niadtong 2007, pasidungog nga gikan sa gikan sa M.O.R. 97.1 Lupig Sila.

Mas ganado sila nga mopagawas pa og mga kanta human sa ilang naangkon nga award. Gani, nakabuhat sila og mga kanta. Pipila niini mao ang 'Di Madutlan', 'Mabdos', 'Bugnawng Yuta', 'Istorya', 'Julie Ann' ug 'Selfon'. Ang maong mga awit nalakip kini sa ilang album nga 'Ambot' EP.

Paspas ang nahimong dagan sa ilang karera dinhi sa Sugbo mao nga sa dihang miabot sila og upat ka tuig, mitikang sila sa Manila pinaagi sa tabang sa Dilaab Foundation Inc. aron nga padayunon ang ilang karera ug aron nga magpamiyembro sa The Filipino Society of Composers, Authors and Publishers, Inc. (FILSCAP)

Sa pag-abot nila sa kauluhan, nakasalmot pa sila sa Jack Daniel Band Competition niadtong 2011 ug nahimo sila nga finalist niini.

Wala magdugay ang ilang tumong nga magkahiusa gihapon sila sa pipila ka mga katuigan gumikan kay didto na nga miabot ang panahon nga aduna na'y mga miyembro nga gusto na nga mag-solo artist.

Wala na lamang gilain og sabot ni Nahsh ang sitwasyon ug girespeto niya ang hukom sa iyang mga kauban.

Karon, anaa na sab nagtukaw ang Assembly Language sa industriya pinaagi sa mga bag-ong miyembro niini nga sila si Ryan Alejandria, Clyde Alcontin, Gezon Dura, Jake Gomez, Gideon Generalao ug nagpabilin gihapon si Nahsh.

Ang unom aduna gyu'y tagsa-tagsa ka mga gihuptan nga katungdanan sa grupo. Si Nahsh mao ang bokalista gawas nga siya ang nangulo sa banda. Si Ryan mao ang guitarist, si Clyde mao ang drummer ug mao sab ang maghimo og blending sa kanta.

Duha ka buok ang parte ni Gezon nga mao ang bokalista ug gitarista. Si Jake mao ang bahista ug si Gideon ang lead guitarist.

Kauban ang mga  bag-ong miyembro, miabot na sa tulo ka album ang ilang nagama nga ubos sa gipanag-iya nga kompanya ni Nahsh nga Lemmonhead Publishing. Ang ilang mga awit madungog na kini sa Spotify.

"Tanan namo nga kanta kay gilisensyahan nako ug ako lang gyud ang nagmaneho og pa-publicize since ako man gyud na gitun-an kung unsa ang trabaho sa usa ka publisher", matud pa niya.

Dakong kalipay ni Nahsh nga nabanhaw ang maong grupo tungod kay dako kaayo kini og parte sa iyang kinabuhi. Dinhi  nagsugod ang iyang pagpaningkamot aron nga mapalambo ang kabililhon sa Bisrock dinhi sa Sugbo. Dinhi usab nagsugod ang iyang pangandoy nga matabangan ang mga musikero kun diin mahatagan kini niya og luna aron nga mahulma ang talento ug makapabuhagay sa ilang gibati pinaagi sa pagama og kanta.

Alang kang Nahsh, bililhon kaniya ang banda nga Assembly Language tungod kay bisan naa na’y  laing grupo ang iyang mga kauban , dali ra gihapon sila magkapaundok ilabi na kun iya kining sangpiton sa higayon nga duna siya’y ipadungog nga bag-ong kanta.

Ang kauban niya kaniadto  nahimo na nga miyembro sa  Sixteen Minutes ug Redstremes.

Nahimo niya kini nga katambayayong aron makakuha siya og dugang komento sa mga pagahimoon niya nga awit.

“Mas importante gyud ang koneksyon kay diri man nimo mahibaw-an og okay ba tanan sa kanta mao nga mas maayo magpundok kanunay sa personal aron nga mas maayo ang pagkomunikasyon sa usa'g usa ilabi na sa paghimo og kanta”, pagtapos pa ni Nahsh.