#Dumagetme

Maayung adlaw mga Kapamilya, Kapuso ug Kapatid! Mapasalamaton kaayo ko sa nakalabay’ng semana, ang panahon nga nahimugso ang atong pagasaw-an matag Biyernes, ang “Lao-Kwatsera.”

Karong semanahona, akong dakong kamaya sanglit dalhun mo nako sa usa sa labing trending nga lugar karon sa Negros Oriental, ang kasikbit nga lugar sa probinsya sa Sugbo, ang Dumaguete.

Kun maghisgot na gyud gani og Dumaguete, alang kanako, makaingun ko sa akong kaugalingon nga mura na pud ni nako’g hometown. Sanglit nahidoul naman sa akong dughan ang maong lugar tungod sa makanunayong pagbisita nako dinhi kuyog ang akong BFF nga si Karla Kintanar Fernandez. Siya ang permeng mobitbit kanako dinhi, ug tungod kaniya, nailhan nako ang akong “self-proclaimed maninoy” nga si Mayor Ipe Remollo, ang amahan sa dakbayan sa Dumaguete ug best-friend pud ni Ms. Karla.

Sulod na sa kapin tulo ka tuig nga pagkaila nako ni Mayor Remollo, napabilib ko sa iyang mga vision o panglantaw sa maong dakbayan nga sa kasamtangang panahon, hinay-hinay na niyang nahatagan og katumanan.  Gani gikonsiderar sab ang Dumaguete nga Sports Hub of the Visayas and Mindanao gumikan kay naka-host na sila og mga nagkadaiyang national ug international sports activities.

Food lover ka ba o mahilig mo-explore og nagkadaiyang pagkaon? Perfect pud ni nga lugar alang kanimo tungod kay naila sab ni sila sa ilang mga “home recipe restos with Spanish influence” sama sa Tres Bistro, Señor Juan, Tinto ug dinhi sab nagikan ang nabantog nga delicacies sa Sans Rival Bistro. Makagutom!

Karong bag- o lang sab, nakadawat sila og pasidungog isip “Best Retirement Place in the Philippines.”

Pipila lamang kini sa mga rekognasyon nga miila sa pagka-malambuon sa usa ka lugar.  Ipuno pa sab nato dinhi ang mga nag-unang respetado ug dagkong tunghaan nga anaa dinhi sa Dumaguete, usa niini mao ang sikat nga Siliman University.

Dako sab nakong kalipay nga sa nakalabay’ng tuig, nahatagan ko og kahigayunan nga makauban si Boy Abunda sa usa ka LGBT event nga gipahigayon sa maong dapit. Nag-una sab nga atraksyon sa maong lugar mao ang ilang “tempurahan” nga nahimutang sa boulevard nga naa gayud sa sentro sa Dumaguete.

Lahi nga tempura experience ang imong masinati dinhi tungod kay may mga gagmay sila nga mga lingkuranan ug lamesa nga gipamutang ug gilinya sa baywalk area sa boulevard, rason aron mamahimo gyung memorable ang imong tempura experience sanglit nabusog naka, best in sight-seeing ka pa sa mga barko nga molabang sa kadagatan nga anaa ra mahimutang sa kiliran nga bahin sa imong gikan- an.

Sayun ra ang pag-adto sa Dumaguete. Adunay barko sa pier ning dakbayan sa Sugbo nga maoy modala kanimo sa maong siyudad. Mosakay ka sa pagkagabii, moabut naka didto sa sayung kadlawn. P600 ra kapin ang plete.

Apan kun gusto ka mosuway og laing rota, pwede ra kaayo kang mosakay og bus sa South Bus Terminal, dili moabot sa P300 ang plete. Ngadto ka monaug sa Santander ug kun anaa naka sa Liloan, Santander Port, mosakay naka’g pumpboat para Sibulan, dili moabot og P100 ang plitehan. Inig-abot nimo sa Sibulan, mag-joy ride ra ka og kapin 20 minutos, moabot na dayon ka sa Dumaguete.

Na hala. I-puno na kana sa inyung bucket-list sa mga lugar nga inyong suruyan karong tuiga.  Kun asa na sab kaha ta maabot sunod semana, mao nay angayan ninyong atangan!