Erich nakauyab na og balik

CEBU, Philippines – Gikumpirmar sa Kapamilya actress Erich Gonzales nga aduna na siya’y uyab karon apan nagdumili kini sa pagbutyag sa pangalan niini. Gitataw sa aktres nga ipabilin  niyang pribado ang  ilang relasyon ug iya kining protektahan aron dili maguba.

Gipahibalo kini sa aktres pinaagi sa iyang gi-post nga vlog niadtong Lunes.

“Well, I think it’s for the best. I want to protect something so precious to me and something beautiful. I don’t wanna ruin it, so sa akin na lang yun,”sigon pa sa Kapamilya actress.

Base sa nanggawas nga mga taho, gikarelasyon niini mao ang igsoon sa uyab ni Claudia Barretto nga ginganlan og Mateo Lorenzo, kinsa usa ka negosyante.

Ang aktor nga si Daniel Matsunaga maoy katapusang nauyab ni Erich.  Giingong gubot kaayo ang breakup sa duha kaniadto. 

Unahon gyud ang kasal

Gipangutana si Carla Abellana sa iyang Instagram follower kun kanus-a man nila plano nga makaanak sa iyang boyfriend nga si Tom Rodriguez. 

Kalmado kini nga gitubag ni Carla, matud pa niya nga unahon nila ang pagpakasal sa dili pa mosulod sa maong butang.

   Una na gibutyag nila ni  Tom ug Carla nga napanglantawan na nila nga sila gyud ang mag-uban sa pagpaso sa altar sa kaminyoon apan dili pa nila matino kun kanus-a kini mahitabo ilabi na karon nga busy kaayo sila sa tagsa-tagsa nila nga showbiz career. 

Miyembro sa Super Junior nanamilit

Nasagmuyo og maayo ang K-Pop fans human gianunsyo sa  singer nga si  Kangin nga mobiya na siya sa sikat kaayo nga grupo nga  Super Junior.

Nangayo siya og pasaylo sa iyang mga kauban gumikan sa iyang kalit-kalit nga desisyon.

Giingong dunay problema si Kangin nga dili  na niya idetalye apan nagpasalamat siya sa tanan niya nga fans nga loyal gyud sa  Super Juinor.

 “I will cheer for the success of Super Junior forever,”matud pa niya.  

Camille nanganak na

Malipayong gipahibalo sa magtiayong  Camille Prats ug  VJ nga natawo na niadtong Miyerkules ang bag-ong sakop sa ilang pamilya.

Gipahibalo ni  Camille pinaagi sa Instagram nga nanganak na siya

Kahinumdoman nga niadtong December 2018 gianunsyo ni Camille nagsabak siya . 

Nikisaw ang pangalan ni Camille kaniadto sa  1995 hit movie nga  Princess Sarah : Ang Munting Princesa. Ang Mars Pa More  sa  GMA-7 maoy kasamtangan niya nga TV show.