The “Golden” Opportunity

CEBU, Philippines — Dili gyud mo-give up sa  pagsaka sa hagdanan paingon sa kalampusan. Mao gyud kini ang gipatigbabaw sa Sugbuanon nga grand winner sa The Clash nga si Golden Cañedo  hinungdan nga nakab-ot gyud niya karon ang iyang pangandoy nga mahimong performer sa telebisyon.

“Dili pud  baya lalim, mag-agi gyud ka og grabe nga  praktis o  rehearsal, bisan kapoy na kaayo ang akong  lawas,   dili gyud mawala sa ako huna-huna nga kinahanglan nga maningkamot gyud ko,” matud pa ni Golden nga nahinabi sa E-Group.

Nisamot pa gyud ang gibati niyang kalipay human niya nasayran nga makatrabaho niya ang  veteran composer  nga si Vehnee Saturno alang sa pagama sa iyang album sa GMA Records.

Tipik sa iyang album mao ang iyang version sa awit nga, “Ngayon” ug i-release kini karong Sabado, November 23. Ang maong awit maoy iyang gikanta atol sa grand finals sa The Clash.

Suma pa sa “Golden Voice of Cebu” nga dako gyud og kausaban ang nahitabo sa iyang kinabuhi sukad siya nakadaog sa The Clash.

“Sa akong nabantayan, nabag-o ang akong kinabuhi . Busy na kaayo sa bag-ong show nga “Studio 7” kay sige na og taping every week para ipagawas every Sunday,” suma pa sa 16 anyos nga singer.

Dakong garbo alang kaniya nga malakip sa musical variety show nga Studio 7gumikan kay nakatrabaho na gyud niya ang mga artista nga sa telebisyon lang niya makita sauna.  Kini sama nila ni Julie Anne San Jose ug Christian Bautista.

“Daghan nang ga- chat nako. Dili nako normal person. Basta mo gawas sa balay kay dapat naa ko’y make-up,” matud pa niya.

 Taga Minglanilla si Golden busa dako ang iyang kalipay sa gi-organize nga homecoming sa GMA Regional TV alang kaniya.

Nitikang siya sa Minglanilla Municipal Hall, Tungkop Elementary School, ug  University of Visayas (UV) Minglanilla Campus.

“Nindot kaayo ang feeling  kay nakita  nako akong kaliwat didto naghilak-hilak, nihilak sad ko. Nagkita sad mi sa akong sa classmates ug teachers. Lipay kaayo ko,” matud pa ni Golden.

Gihugupan usab ang iyang mall show sa Robinsons Galleria Cebu .

Gitagana gyud ni Golden sa iyang pamilya ang premyo niya nga P1 million, sakyanan, balay ug yuta.

Siya ang nagsilbi karon nga breadwinner sa iyang pamilya. Target usab niya nga tabangan ang masakiton niya nga ig-agaw.

Naganahan na usab si Golden sa pa-arte human nasuwayan ang abilidad niya niini sa drama anthology nga  “Magpakailanman” nga nagkutlo sa iyang  life story.

Tua na sa kaulohan nagbasa ang pamilya ni Golden ug didto na siya motiwas sa iyang pag-eskwela.

Matud pa niya nga wala gyud niya damha ang iyang kadaogan gumikan kay lig-on gyud puros ang iyang kauban nga Clashers.

“Pag- grand finals  , nag-ampo ko ug ako gihatag ang akong best. Giwala nako ang akong kulba. Gihuna-huna nako nga mao natu ang last nako nga performance sa The Clash maong tarungon  gyud nako og maayo,” panapos pa niya.