John Lloyd ug Shaina hagbay rang nagbuwag!

CEBU, Philippines - Hagbay ra matud pa nga nagbuwag sila si Jhon Lloyd Cruz ug Shaina Magdayao, apan giklaro sa tinubdan nga ekslusibong nahinabi sa Philippine Entertainment Portal (www.pep.ph) nga walay kalambigitan niini si Angelica Panganiban ug Derek Ramsay. Nasayran nga gilambigit si Angelica karon ngadto kang Loydie nga matud pa nagkadibilapay samtang nag-shooting sa ilang umaabot nga pelikula para sa Star Cinema didto sa Vietnam. Apan matud pa sa tinubdan sa PEP “months ago” nagbuwag sila si Shaina ug Loydie ug nahitabo kini atol sa usa ka party sa balay mismo sa dalaga, diin giingnan matud pa ang young aktres sa ilang kamaguwangan nga si Shiela og, “Tama na.” Nga ang buot pasabot panahon na nga papahuwayon ni Shaina ang iyang kasingkasing ug buhian na ang relasyon nila ni Loydie. Lakip sa mga rason nga gitumbok sa tinubdan mao nga dili matud pa suod si Shaina ngadto sa pamilya sa aktor. Ug sanglit bata pa, demanding matud pa og panahon ang aktres gikan sa aktor, sama na lang kun mularga sila sa gawas sa nasud, diin buot matud pa ni Shaina nga sila lang duha ug wala ang pamilya ni Loydie. Si Shaina, 22 anyos samtang si Loydie, 28 anyos. Matud pa sa tinubdan nagpatong-patong ang ginagmay nga suliran sa ilang relasyon hinungdan nga hingpit nilang nahukman nga magbuwag na. Kahinumduman nga adtong October 2011 unang nagbuwag ang duruha human usab nalambigit si Ruffa Gutierrez apan nagkabalik ra sila sa kadugayan ug nahukman nila nga himuon na nga pribado ang ilang relasyon.