Miss Mandaue 2012 Tuazon, Labing Lig-on!

Photos by: Joy Torrejos

CEBU, Philippines - Sa labing unang higayun sa kasaysayan sa Miss Mandaue Pageant, 12 ra ka mga kandidata ang magtigi ugma sa alas siete sa gabii diha sa J. Centre Mall. Gumikan niini, tataw nga hinashasan gayud ang 12 ka mga maanyag ug utukan nga dalaga nga nakalusot sa higpit nga screening.

Gani adtong Abril 26, diha sa Montebello Hotel, sa pakighimamat sa mga kandidata sa press, dayag ang ilang dakong pagsalig sa ilang kaugalingon, dihang tagsa tagsa na sila nga mitubag sa mga pangutana.

Atong sination ang 12 ka mga kandidata:

1. Maria Cassandra Yu -- -Kining 18 anyos nga dalaga may gitas-on nga 5’5 ug tinun-an sa University of San Carlos sa kurso nga Business Administration. Cutie, may pahiyum nga anggid sa kang Miss Earth Water ug Miss Olive C Muriel Orais. Nakontrobersyal lang siya og kadiyot dihang mitubag siya nga mas sayon ra ilhan ang babaye kaysa bayot nga babaye kaayong tan-awon. Ang tinuod nga babaye niya pa, respectable.

Sa iyang kaanyag ug sa iyang pagka-fresh looking ingon man bubbly personality, dako kaayo og puruhan si Yu nga malakip sa top three.

2. Jomalyn Seldura --- May gitas-on nga 5’5 kining 20 anyos nga dalaga nga kun tan-awon sa hulagway may pagka Latina og dagway. Sa personal nindot siya og pahiyum. Tinun-an sa kurso nga Business Administration sa University of San Carlos.

3. Febb Flores — Suma pa niining 22 anyos nga registered nurse magmugna siya og blog kabahin sa dakbayan sa Mandaue isip pag-promote niini. Produkto sa Velez College, si Febb may gitas-on nga 5’4.

4. Armejoice Bael --- Engaging, gaan imong paminaw kun kaatubang nimo kining 21 anyos nga registered nurse ug nag-alagad karon sa Vicente Sotto Memorial Medical Center. Tudluan matud pa niya ang mga mulupyo sa dakbayan sa Mandaue kabahin sa 3Rs—Recycle, Reuse, Reduce.

5. Daisy Rell Lopez — SK Chairperson ang 17 anyos nga si Lopez ug may gitas-on nga 5’5. Siya Accountancy student sa University of San Jose Recoletos. Suma pa niya, kun makadaog magmugna siya og feeding program para sa mga kabataan ug hingusgan usab niya ang pag-edukar sa kinabag-an kabahin sa pag-amuma sa kalikupan. Undanon manubag si Lopez, apan may mga higayun nga dili natural ang iyang pahiyum ug lihuk. Sigurado gyud hinuon nga mupakita siya og maayong labok ugma sa gabii ug mutapos isip runner-up.

6. Keena Mary Anne Sumido — Kinabataan nga kandidata karong tuiga sa pangidaron nga 16 anyos, apan dili kabintahaan ang barug sa gitas-on nga 5’6. High school graduate siya sa Naval State University kinsa namahayag nga, “ a child is the greatest asset of a nation,” busa kinahanglan nga amumahon. Kun basihan ang mga nanglabay nga Miss Mandaue pageants diin ang kinabataan maoy midaog (Stephanie Seneres, Hazel Ceniza), dili halayo nga malangkat niya ang korona, sanglit dili man kabintahaan ang iyang tinubagan. Finalist siya sa My Girl sa ABS-CBN ug siya usab maoy Miss Biliran.

7. Nicole Tuazon — Cum Laude sa kursong Electronics and Communication Engineering sa University of San Carlos. Kining 21 anyos nga si Nicole may gitas-on nga 5’6 ug maoy napili nga Darling of the Press adtong Abril 26. Si Nicole nga anggid ni 1999 Miss Universe First-Runner Up Mirriam Quiambao, tataw nga maoy labing lig-on nga kandidata karong tuiga. The smile, the move, the wit…so queenly. Period!

8. Namrata Neesha Murjani — Usahay niya pa, makasinati siya og diskriminasyon gumikan sa iyang skin color apan niya pa, “our color is also our asset.” Siya 19 anyos ug may gitas-on nga 5’7. Si Murjani usa sa mga kandidata nga diretso ug pintok mutubag, nga maoy iyang bintaha ugma puhon sa koronasyon. Tinun-an siya sa Velez College sa kursong Medical Technology.

9. Zennybelle de Los Santos --- Kining 18 anyos ug may gitas-on nga 5’7 nga dalaga, tinun-an sa kursong Mass Communications sa St. Theresa’s College. Apan kiwaw palandungon nga wala siya masayud kabahin sa isyu sa Scarborough Shoal o Spratly Islands. Dalaygon hinuon ang iyang pagbarug pabor sa mga madre sa STC kabahin sa mga tinun-an niini nga wala makapaso gumikan sa kontrobersiyal nga mga hulagway nga namantala sa Facebook. Gihulagway niya nga “misbehavior” kadto sa habig sa mga estudyante ug kalapasan sa patakaran sa tunghaan.

10. Michelle Uy --- Miss Christmas Queen sa University of San Carlos diin siya nagtungha sa kurso nga Management Accounting. May gitas-on nga 5’7 ug 18 anyos. Fresh-looking ug spontaneous. Posibli nga masulod sa top five.

11. Jacqueline Pedotti --- Psychology student sa Cebu Doctor’s University kining 19 anyos nga dalaga ug may gitas-on nga 5’8. Saysay pa niya, dream come true ang iyang pagkalakip sa Miss Mandaue sanglit pangandoy niya ang mamahimong beauty-queen.

12. Joanne Bonnety — Usa sa duha ka mga labing bata nga kandidata karong tuiga sa pangidaron nga 16 anyos, apan siya maoy labing taas sa iyang height nga 5’9. Third year high school siya sa Athenaeum International School, ang height ni Bonnety dako kaayo nga plus factor aron dili siya mabalewala sa entablado, ilabi na nga dili usab mahimong palabyon ang iyang dagway. Bata man tuod, alegre ug undanon ang iyang tinubagan.’It’s better to love than be loved,” niya pa ug happiness can’t be bought. Masulod sa top 5.

Pwes ang fearless forecast sa Banat News Hugyaw mao ni:

-Magtigi sa korona sila si Tuazon ug Sumido.

-Masulod isip runners –up sila si Murjani, Bonnety ug Yu.

-Alternatives sila si Uy, Lopez , ug Seldura