Lindsay motikang sa Pilipinas

CEBU, Philippines - Gisumsuman karon ang taho nga matud pa mobisita sa Pilipinas sa wala pa matino nga petsa ang Hollywood actress nga si Lindsay Lohan .

Suma pa nga giasikaso na karon sa usa ka local clothing brand ang gikatakdang pag-anhi sa kontrobersyal nga aktres ug malakip kini sa fashion show. Una na nga nakaplastada ang mga dagway ni Lindsay sa mga billboard sa Jag Jeans nga nahimutang didto sa kauluhan.

Makauban matud pa ni Lohan sa pagrampa sa fashion show ang kanhi housemate sa Pinoy Big Brother nga si Ivan Dorschner kinsa misikat usab human kini mahagki sa singer nga si Katy Perry sa dihang nag-concert kini dinhi sa nasud.

Gawas kang Lindsay, ubay-ubay napud ka mga international stars ang nakabaton og endorsements dinhi sa Pilipinas ug kini sama nila Ed Westwick, Thai superstar Mario Maurer , Michael Trevino ug Katie Holmes.

Kris ug Jolo nagbuwag

Giangkon ni Kris Bernal nga nabungkag na ang nahulmang relasyon nila ni Jolo Revilla.

Dili na buot idetalye ni Kris ang rason sa ilang break-up apan iyang gitataw nga susama sila nga busy busa mas gipili nila nga mag-friends na lang.

Nasayran nga busy kaayo si Jolo sa iyang trabaho isip kapitan sa usa sa mga barangay sa Cavite samtang si Kris naka-focus sa serye niya nga Hiram na Puso nga magsugod na karong Lunes.

Gipadayag ni Kris nga iya unang papahuwayon ang iyang kasing-kasing aron maka-focus siya sa iyang trabaho.

MMP vs. DND

Gikatahong dili na madayon ang live telecast gikan sa Batangas province ang programang Manny Many Prizes ugma sa gabii.

Matud pa nga nakahukom ang production staff nga dili na lang idayon pagbisita sa game show ni Kongresista Manny Pacquiao sa Batangas gumikan kay dili maka-guest si Batangas Governor Vilma Santos-Recto.

Apan dali dayon kini nga giintriga sanglit ang maong programa maoy kaatbang sa show sa anak ni Vilma nga si Luis Manzano nga nag-ulohan og Kapamilya: Deal or No Deal kung diin susama gyud ang timeslot niini.