Parol ibalik pagpasalida

CEBU, Philippines - Ang award winning nga ‘Parol’ episode sa “Maalaala Mo Kaya” nga gibidahan nila ni Enchong Dee ug Helen Gamboa ibalik pagpasalida karong Sabado sa gabii, Disyembre 31. Ang nahisgutang episode maoy hinungdan nga nakadawat og award si Enchong isip “Best Single Performance by an Actor’ samtang si Helen mao usab ang ‘Best Single Performance by an Actress’ 8th Golden Screen TV Awards.

Luis gihangop sa fans ni Jen

Dako ang pasalamat ni Jennylyn Mercado ngadto sa iyang loyal fans gumikan kay gihangop nila ang iyang boyfriend nga si Luis Manzano. Matud pa nga giimbitar gyud si Luis sa party nga giorganisar sa fans club ni Jennylyn.

Rayver kiligon sa dimples ni Cristine

Gipadayag ni Rayver Cruz nga kanunay siya kiligon kung makakita siya sa dimples sa iyang uyab nga si Cristine Reyes. Giklaro hinuon ni Rayver daghan og sitwasyon nga kiligon siya sa iyang uyab apan maglisod siya og detalye niini gumikan sa kadaghan.

Yutang natawhan

Suma pa ni Maria Isabel Lopez nga sa Cagayan de Oro siya natawo hinungdan nga wala gyud niya sipyata ang pagduaw sa maong dapit aron mohimo og relief operation sa mga biktima sa dakong baha.

Jennica mitabang sa mga biktima sa bagyo

Tsika pa ni Jennica Garcia nga nakasuway na siya og paet nga kaagi niadtong panahon sa bagyong Ondoy hinungdan nga nasayod siya kung unsa kapaet kung mabiktima sa bagyo.Si Jennica mipadangat usab sa iyang hinabang ngadto sa mga biktima sa Bagyong Sendong nga miigo sa pipila ka parte sa Mindanao.

Kabanay ni Marvin naapektohan sa baha

Matud pa sa Survivor castaway nga si Marvin Keiffer nga pipila sa iyang mga kabanay ang naapektohan sa baha didto sa Cagayan de Oro busa personal siya nga miduaw sa maong dapit aron motabang sa relief operation. Si Marvin nagtubo sa Cagayan busa dili niya malimtan ang maong dapit.

Carla modawat bisan unsa

Suma pa ni Carla Abellana nga dili siya mamili og role sa nagkadaiya niya nga proyekto ug usa kini ka instrumento aron magmalamboon ang iyang career.

Kris nanghatag og pinaskoahan

Gitambongan gyud ni Kris Aquino uban sa iyang mga anak nga sila si Josh ug Bimby ang kalihukan sa Department of Social Welfare and Development (DSWD) sa miaging adlaw kung diin nanghatag sila og pinaskohan sa mga street children.

Reward sa kaugalingon

Luyo sa kalampusan sa showbiz career ni Jericho Rosales, gipadayag sa aktor nga tagaan pud niya og reward ang iyang kaugalingon pinaagi sa paggahin og todo nga oras sa pagpalit sa gusto niya nga mga butang.

Hugyaw nga gift

Tsika pa ni Marian Rivera nga ang iyang kaugalingon maoy pinaka-hugyaw nga Christmas gift alang sa iyang uyab nga si Dingdong Dantes.

Bong nagpasalamat sa fans

Mapasalamaton si Sen. Bong Revilla sa tanang nanan-aw sa pelikula niya nga Panday 2 kung diin kasamtangang nahimutang sa ikaduhang puwesto sa listahan sa kusog nga mga pelikula sa Metro Manila Film Festival.

Janelle gipaubos na sa WPP

Gidawat na sa Department of Justice ang aplikasyon sa uyab ni anhing Ramgen Revilla nga si Janelle Manahan busa gipaubos na kini sa Witness Protection Program (WPP).

Ai Ai nakauyon kang Enteng

Gumikan sa kalampusan sa Enteng ng Ina Mo, gipadayag sa usa sa mga bida niini nga si Ai Ai de las Alas nga bukas siya sa posibilidad nga himoan kini og laing installment sunod tuig. (BANAT NEWS)