I am five years old

Happy Birthday hugyawnatics! How old are you?

Pagka paspas miligid sa katuigan. Daw kagahapon lamang gilusad kining inyong ginuntan nga Hugyaw section, apan wala lang damha lima na kita katuig karong adlawa.

Kuwang ang mga pulong pasalamat nga maggikan sa kinauyukang bahin sa among kasingkasing gumikan sa walay puas ninyo nga pagpaluyo niining imo, ako, atong tanan nga Banat News Hugyaw. Gumikan niini, agig pasalamat, isaad ko—dinuyugan sa mga maabtik ug puno sa talento nakong mga kaabag—nga ibubo pa nako ang tanan nga akong mahimo aron mas magmabulukon ug mas hugyaw pa ang inyong Hugyaw niining tuig 2011.

Tataw nga nakaangkon gayud kami og luna diha sa inyong mga kasingkasing tungod kay sa paglabay sa katuigan nahimugso ang daghang mga ngalan nga nagmatuod sa atong pag-inunungay. Naa nay gitawag og Kristalites, ang mga bumabasa sa makalingaw nga lindog sa beterana na kaayong si manay Kris Relatado matag Martes ug Sabado. Naa pud ang mga OkRyanians, ang mga nagsunod sa OkRyan ni Ryan Mark matag Huwebes, samtang dili pud magpauwahi ang mga BisChikadoras, nga kanunay’ng nag-una og basa sa mga ekslusibong chika ni Kapusong Yuri matag Domingo. Ug kinsa may makalimot sa mga ka-Bonding ni Kapamilyang Adrian nga magsawo sa Banat News sa higayon nga duna siyay mga scoops matag karon ug unya?

Mapasigarbuhon pud ko nga mupahibawo nga pabilin gihapon natong kauban sila si Garry ug Vatski sa ilang BANATanay, diin kagubtan gyud sila kada Lunes. Kauban nato sila sukad sa sinugdanan, ug naa gihapon sila hangtud karon. Di ba hugyaw ra? Samtang ang atong Spotlight padayon gitamdan sa mga mahiligon kaayo og beauty pageants, padayon kining nagpaila matag karon ug unya sa mga lab-as nga dagway sa natad sa indigay sa kaanyag. Lima ka tuig na nga mipadan-ag sa spotlight ngadto sa mga haom niini pinaagi sa paningkamot ni Sanden Jacaban Anadia. Pero kun duna man gani tipik niining Hugyaw nga sigurado ko nga giatangan, kinaham, ug kanunay nga gipaabot sa kadaghanan, kana walay lain kundili ang PAK—Pakpak o Palpak? PAK I would say is the most effective, most successful creation of Hugyaw! Tungod kay bisan asa ko mapadpad, bisan kinsay akong ikahibalag, dili gyud masipyat nga mahisgutan gayud ang PAK! Salamat kaayo. Pwes, Pakpak!

Sa katapusang buwan sa 2010 among gipaila diha ninyo ang duha ka mga bag-ong anak sa Hugyaw, ang RC ug SHOWtown. Alang sa wala pa makabasa, ang RC maoy magyagyag sa Chika nga diha-diha dayon magtangag pud sa Reaction sa natungdan. Samtang ang SHOWtown maoy mumantala sa dagkong kalingawan diha sa inyong pinalanggang lungsod. Yes, himuon nato nga bida ang imong yutang natawhan. Manghinaot kami nga sa 2011 mulig-on ang atong pagpakigtambayayong kang Dennis Tañoc sa Sugbo TV.

Karong tuiga padayon kaming mamati ug mudawat sa inyong mga hunahuna o opinion unsaon nga mas mulambo ang atong panaghugyaw. Hugyawnatics nakadungog kaayo kami sa inyong gusto nga mahitabo—mas daghang features kabahin sa mga local talents. Pwes, dinuyogan sa inyong pag-abag, amo kanang paningkamutan nga mapaambitan diha kaninyo sa musunod nga mga bulan niining tuiga.

Sa makausa pa daghan kaayong salamat. Sa gihapon tabangi kami ninyo tungod kay this is your section, this is our section—HUGYAW!