Freshest, Youngest and Brightest

Una niyang salga, ug siya maoy nagmadaugon. Kini maoy kasaysayan sa 15-anyos nga si Iris Mae Liganay sa Tribu Sinanduloy sa Tangub City kinsa gikoronahan isip Sinulog Festival Queen 2009 niadtong Biyernes sa gabii diha sa Cebu City Sports Center. Gipildi niya ang 22 ka mga dancers gikan sa nagkadaiyang Sinulog contingents

Doble ang kalipay ni Liganay sanglit siya pud ang labing unang lead dancer sa Tribu Sinanduloy nga milangkat sa titulo. Tam-is pud nga palandungon alang ni Liganay sanglit siya ang labing bata nga lead dancer nga nakigtigi niadtong gabhiona. Gani, wala siya magdahom nga iyang malangkat ang prestihiyoso nga titulo.

“I was not expecting that I could really win as Festival Queen. I am very happy, I really reap the labor of all my sacrifices. I really sacrifice everything for this and for my great devotion to Sto. Niño”, matud pa ni Liganay sa exclusive interview sa Banat Hugyaw.

“This is my very first time to be the lead dancer and I am glad that I was able to make it to the top, I owe everything to Sr. Sto. Niño,” dugang pa ni Liganay.

Hinuon kun sa barug lang daan, stand-out na si Liganay sa iyang 5’7 nga height. Gani ang fourth year high school student sa Tangub National High School sakop sa dance sports team sa Tangub. Siya ang kasamtangang Miss Intramurals sa ilang tunghaan ug nahimong 4th runner-up sa Miss Tangub City 2008.

Gawas sa korona, midaug pod si Liganay og special awards sama sa Miss Careline ug Miss Casino Femme.

Sa laing bahin, ang 18-anyos nga si Arrianne Mae Briones sa first-time participants, Karatong Festival sa Dulag Leyte, maoy 1st runner-up. Si Briones usab ang midaug isip Best Solo Performer.

Ang 2nd runner-up title gihatag ngadto kang Alfe Marie Nathanile Uy, sa Pakol Festival sa Sta. Catalina, Negros Oriental. Si Uy ang midaug isip Best in Costume by Samsung ug nadawat niya ang 21-inch Samsung colored television.

Ang pambato sa Alcoy nga si Chelo Mae Timtim sa Siloy Festival maoy 3rd runner-up, samtang si Rotahmae Verano sa Tribu Arthro-Abellana National School maoy nahimong 4th runner-up. Ang drum and bugle corpse sa Tribu Arthro ang midaug isip Best in Instrumentation Award.

Bisan og wala siya malakip sa Top 5, si Maria Vilma Calderon sa Punta Princesa niining dakbayan maoy Miss Photogenic. Ang Best in Production gihatag ngadto kang Laura Kim Corregidor sa Tribu Kabatok sa Tacloban City.

Ang mga hurado sa maong kompetisyon mao sila si Miss Earth 2008 Karla Paula Henry, designer Salvador Malto, Rachel “Cutie” Del Mar ug Power Dance Company founder Douglas Nieras. Ang maong kompetisyon usa sa mga highlights sa annual Sinulog Festival, diin kapin sa 5, 000 ka mga tawo ang mitan-aw sa maong indigay sa kaanyag. Apan dili lamang kaanyag ang gibasehan niini, labaw sa tanan gihatagan og igong gibug-aton ang makabibihag nga sinayawan sa matag contestant isip lead dancer.