Nagkagubot  sa “ongo”

Nahugyaw (naukay, nagubot), ang accounting department sa The Freeman kagahapon sa buntag gumikan sa usa ka lalake nga caller nga mireklamo nganong “ongo” ang gigamit nga term sa Banat Hugyaw sa artikulo nga napatik kagahapon, nga naghulagway sa mga banggiitan o mga kandidata nga dunay nay korona nga nadaog sa ilang pagsalmot sa indigay sa kaanyag sa barangay, kalungsoran ug lalawigan, sa wala pa sila motekang alang sa Ms. Mandaue 2008. Posibling wala lang gyud makasabot ang maong caller o wala siya magpakabana sa mga panghitabo sa iyang palibot, sanglit ang pulong “ongo” nga gamiton paghulagway og kandidata sa usa ka pageant nagpasabot og: banggiitan, beterana, nakoronahan ug hawod na og mga indigay sa kaanyag. Ang maong caller nanghadlok pa nga moreklamo ngadto sa tag-iya niining mantalaan gumikan lang sa maong pulong nga “ongo.”  Pipila ka mga tawo nga gipangayuan og reaksyon  kalabot sa term nga “ongo” nga gigamit sa artikulo kagahapon, ang igo lamang mikatawa sa dagan sa panghitabo. Ang PR  Consultant and Communications  Specialist nga si Orly Cajegas kinsa self-confessed beauty pageant  junkie usab, walay nakita nga sayop sa term nga “ongo” nga gigamit sa artikulo.  “It’s actually a term of endearment bestowed by people in the know, the movers and shakers of the pageant world. Given fact naman  na. It’s not a slur or an attack to the seasoned candidates. You are only calling a spade a spade,” nagkanayon si Orly.

 Samtang usa ka model agent nga “ ongo” na pod sa pagduma og models ug beauty titlists ang nakapangutana og :  Why man tawon oi nga gay lenggua ra man na tawn? Faet! Pakatawa ra man na. Laing “ongo sa tanang mga ongo” nga model agent ang miingon: ‘Para nako dili ka sayop coz those terms, (ongo and mangtas), have been used for ages now.”

Lain pa gyong model agent ang miingon: “Di man tingali (dili sayop). Binisaya man gud mao murag exaj (exaggerated). Para nako ok ra man to (article).

Samtang si Bb. Pilipinas- World 2006 ug Miss Mandaue 2005 Anna Maris Igpit nga gipangayuan og reaksyon sa Banat Hugyaw kun sayop ba ang paggamit og term nga “ongo” sa maong artikulo ang miingon: ‘Hoy di jud..it’s a term in the pageant industry. I even refer myself as ongo sa pageant. I even used that term in my workshop with them (candidates). It is not something we should be offended of. Seguro sa mga wa naanad sa term but I believe what you’re referring to is normal in the pageant industry.”

Hugyaw says: Kung basehan ang mga pamahayag sa mga “ongo” angay magpasalamat ang Miss Mandaue 2008 organizers tungod kay nagpasabot lamang kini nga maayo ang ilang mga napili nga kandidata karong tuiga ug sigurado gyud nila nga ikapasigarbo, sama sa mga nakalabay nga mananaug. Kini ra “ongo” nga positibo ang kahulogan, sanglit—de kalibre, beterana, banggiitan ug mga hawod—nga kandidata na pod ang magtigi karong tuiga.