Daisy Romualdez ayaw nang makasama uli si Danita
Nakakuwentuhan namin si Mama Daisy Romualdez nung isang hapon sa lobby ng ABS-CBN, napansin namin na mukhang matahimik na ang kanyang kalooban ngayon tungkol sa paglalayas ni Danita Paner, hindi na siya naliligalig na tulad nung mga nakaraang araw.
“Ako, ginawa ko na ang lahat-lahat, pero nagmamatigas pa rin siya, hanggang dun na lang talaga ako. Ayokong may mangyaring masama sa kanya, pero kailangang may matutuhan siyang leksiyon sa ginawa niya.
“Ayoko nang pasakitin pa ang kalooban ko, nasaktan na ako, kung para sa kanya, e mali ang patakarang ipinagagawa ko sa kanya, bahala siya sa buhay niya,” madiin pa ring sabi ni Mama Daisy.
Nakakalungkot ang kinauwian ng istoryang ito, nitong mga huling araw na lang namin nalaman na si Danita pala nung sanggol pa ay iniwan lang sa may gate ng bahay ng pamangkin ni Mama Daisy.
Payat ang sanggol, masakitin pa, pero ginawa ni Mama Daisy ang lahat para mabigyan ito ng magandang buhay. Halos hindi niya ipinakagat sa lamok si Danita, itinuring na sarili niyang dugo at laman, kaya masamang-masama ang loob niya sa iginanti sa kanya ng dalaga.
“Nung minsang nag-iisa lang ako sa kuwarto ko, umiyak ako nang umiyak, hindi ko kasi akalaing magagawang magmatigas ng ganito sa akin ni Danita. Sinisisi ko ang sarili ko kung bakit ko siya minahal nang sobra, kung bakit sinunod ko ang halos lahat ng layaw niya.
“Yun ang iniiyak ko. Nasasaktan ako, para siyang tunay na anak para sa akin, pero hindi niya naman pala ako itinuring na tunay na nanay niya,” seryosong sabi ng beteranang aktres.
Tumatawag daw ngayon si Danita kay Tito Manny Paner, pero kung si Mama Daisy ang masusunod, ayaw na niyang makasama pa sa isang bubong si Danita.
Palagi raw kasing babalik sa kanyang isip ang mga pinagsasabi nito kamakailan, na impiyerno ang buhay nito sa kanya, samantalang glorya ang alam niyang ibinigay niya rito.
Gusto niyang maipagkumpara ngayon ni Danita ang buhay sa labas ng kanyang bahay at sa pag-aarugang ginagawa niya rito, gusto niyang mapatunayan ni Danita sa kanyang sarili na walang ibang taong makapagmamahal sa kanya kundi si Mama Daisy lang, dahil ang beteranang aktres ang nagturing na hindi na iba sa kanya.
* * *
Maraming nabubuwisit kay Jen da Silva, ang miyembro ng 26K na kalalabas lang sa Bahay ni Kuya, sumosobra na raw ang pagiging palengkera ng dalagang ito, marami nang gustong maipaghiganti si Marylaine Viernes, ang kanyang kasamang napalabas sa PBB house.
Sa mga napanood naming panayam ni Jen ay ganundin ang impresyong nabuo sa amin, palengkera ang babaeng ito, maganda lang siya pero kapos siya sa breeding.
Kapag magkatabi sila ni Marylaine ay kitang-kita ang malaki nilang pagkakaiba, kumikilos nang maayos si Marylaine, samantalang barubal naman kung kumilos at magsalita si Jen.
Isa pang ikinaiinis ng marami sa babaeng ito ay ang pagiging feeling maganda at sikat na siya agad, samantalang wala pa nga siyang napatutunayan kundi ang kumendeng-kendeng at humawak ng maleta sa Deal or No Deal.
Mabuti na lang at edukada si Marylaine, mabuti na lang at mahaba ang pinaghuhugutan ng pasensiya nito, dahil kung iba lang ang natapatan nitong si Jen ay baka dumudugo na ang bibig niya ngayon.
Wala pang puwedeng ipagmalaki si Jen kundi ang malalaki niyang boobs na halos lumuwa na sa kanyang bra, maldita siyang magsasagot, nakakaawa ang maraming tao kapag nabiyayaan siya ng pagkakataong makilala.
Kung bibilangan namin ang mga negatibong mensaheng tinatanggap namin ngayon araw-araw tungkol kay Jen ay mahihirapan siyang magbasa, isang malaking palatandaan ito na ayaw ng ating lahi sa mga taong maangas, ayaw ng mga Pinoy sa mga taong hindi pa man nasisinagan ng mga ilaw at camera ay mayabang at feeling na.
- Latest