Ang “kabuang” sa Brain Damage

Brain Damage. Bisan kinsa ang makabasa o makadungog sa maong mga pulong, wa gyod tingali laing mosantop sa atong hunahuna kundili ang negatibong impresyon. Ang dali natong pagsabot niini mao nga ang hingtungdan nalisoan sa maayong pangisip o nabuang, o kundili ba, wala sa saktong panghunahuna o kuwang-kuwang. Mao nga sa dihang milanog-lanog sa kahanginan ang Bisrock nga kantang “Papilit” nga naghubit sa kasinatian sa adiksiyon diin maoy gigamit sa hingtungdan ang paghingos sa rubber cement ( mas gitawag sa kadaghanan og rugby ), daghang hunahuna sa mga Bisrockers ang nataga sa pangutana kun tinuod ba gyod nga mga “katok” og utok ang mga membro sa bandang Brain Damage. Kay ang ngalan sa banda ug ang kasinatian nga giladlad sa maong kanta, maingon man nato nga pwerte gyong takdoa. Apan sa mga nakaila kanila labi na gyod sa ilang mga suod nga higala, dako ra kaayong balista ang ilang mga panghunahuna ug kinaiya kun itandi sa tinuod nga kahulogan sa ngalan sa ilang banda.

Ang Brain Damage gilangkoban sa mga batan-ong rakista nga pulos naggikan sa lungsod sa Pinamungajan. Gitibuok nila ni Christian Ando (vocals), Jade Rubie Luna (rhythm / lead guitar), magsuong Ryan Alqueza (bass guitar) ug Reynante Alqueza ( rhythm / lead guitar ), ug Jane Ernie Cuizon (drums). Kini silang lima maoy responsable sa misikat karong mga kanta sa Bisrock nga “Papilit” ug “Tabanog”  nga kanunay nang madungog sa 93.1 Smash FM. Apan miingon ang grupo nga daghan gyod ang nangutana ug nanaway sa ngalan sa ilang banda. Nga sa kadaghan sa kapilian nga angay kunong ingalan, nganong ang Brain Damage man gyod maoy ilang napilian. Duna gyod kahay nagpahipi niini nga kahulogan? Unya ilang giasoy ang dili makalimtang kasinatian nga kabahin sa ilang kabatan-on nga kun ilang mahinumdoman, igo na lang silang mahimuot karon.

Pulos sila estudyante sa Pinamungajan National High School. Gawas ni Ryan ( bass guitar ) nga nahisakop sa laing seksiyon, classmate ang upat sa third year ug nag-abot sulod sa lawak - tun-anan nga may iya-iyang kasipat ug “kakalog” kun “kabuang”. Sila nanghingasoy nga sila maoy kinapatingan sulod sa klase kun ang kabadlungon lang ang hisgotan. Dihay kausa gipatawag sa guidance counselor si Christian ug Jade kay mireklamo ang ilang adviser nga ang “kabuang” sa duha  di na gyod mabangbang ug ang ilang kasipat “makadakop kuno og yawa”. Hinuon, bisan pa man og ingon ini ang ilang gimik sa eskuylahan, apan wa magpasabot nga ilang gitalikdan ang ilang pagtuon.

Usa niana ka adlaw, nagdala og sista si Jade sa eskuylahan. Didto ilang nadiskobre nga silang lima pulos diay may hilig sa musika. Mao kadtoy sinugdanan nga inanay’ng nausab ang ilang kinaiya. Nawala ang ilang kasipat ug kun dunay bakanteng oras nga ilang matan-aw nga wala  na silay tun-anan, pirme na silang magkanta-kanta sulod sa tunghaan. Imbis magkiat-kiat ug magpabadlong sa maestra, ang pagkaskas sa sista dungan ang pagsing-al sa paborito nilang mga kanta mao nay ilang gikalingawan pagpalabay sa kalaay.

Summer 2001. Paingon na silang mag-4th year high school dihang ilang nasabotan ang pagtukod og banda. Kini ilang gihimo aron pagmatuod sa ilang magtutudlo nga dili lang pulos kakiat ang naa sa ilang alimatmat. Gusto nilang ipakita nga nagbag-o na sila. Giangkon sa lima nga mauwaw na gyod silang ingnong mga sipat sa ilang maestra labi na gyod ngadto sa mga classmate nilang mga dalaga. Sa pilmiro naglibog sila koun unsay ingalan sa ilang grupo, pero sa dihang ilang nahinumdoman ang di matupngan nilang “kakalog”, ilang gikauyonan nga Brain Damage maoy ingalan sa banda bisag sila nasayod nang daan nga kini makasugat gyod og pagsaway sa kadaghanan.

Ug tuod, nasubhan gyod ang ilang katakos kun unsa diay sila “kakiat” pag-abot sa natad sa musika. Una nilang pagtukar sa stage mao kadtong dunay gipahigayong espesyal nga kalihokan ang Sangguniang Kabataan sa Poblacion, Pinamungajan, Sugbu. Bisan pulos lang cover song sa nagkalain-laing genre ang ilang gitukar niadtong gabhiona apan nakita nilang nalingaw  gyod kaayo ang mga tawo. Sukad niadto, kanunay nang dunay modapit kanila aron patukaron sa lain-laing okasyon sa mga silingang dapit sa lungsod sa Pinamungajan. Wala pa sab silay kaugalingong instrumento niadtong panahona. Lisod gyod unta kini nga sitwasyon alang kanila kay mangabang pa man sila sa higayon nga magpraktis sila ug kanang dunay moimbitar kanila. Pero wa ni nila hunahunaa. Ilang gipadayon ang gibating nagdilaab nga gugma sa musika.

Tuig 2005. Kahinumdoman nga kining tuiga maoy hingpit nga pagtublaw pagbalik sa Binisayang mga kanta. Daghan ang nakalantaw niining panahona nga sa di madugay, moabot gyod ang usa ka phenomenon sa Bisrock. Tinukmod sa kaikag ug kadasig gumikan sa kalamposang nakab-ot sa nag-unang mga Bisrock bands sama sa Missing Felimon ug Mantequilla diin may mga membro usab nga naggikan sa lungsod sa Pinamungajan, maoy hinungdan nga misuway usab pagtagik og mga kantang Binisaya ang Brain Damage. Dili sa rason nga sila nagsundog-sundog o misakay lang sa uso.

“Ang tinuod, ni-pursue mi sa Bisrock, bay, agi’g paglingi sa lumad  natong pinulongan. Bati man gud paminawon nga maayo kaayo tang motukar sa Iningles ug Tagalog, pero diay to, di kamao motukar sa atong kaugalingong sinultihan,” matod pa sa batan-ong bokalista nga si Christian.

Ug wa makawang ang ilang pagkugi ug labaw pang wa gyod nila damha nga mosikat ang ilang kantang “Papilit”. Unya gisundan pa gyod kini sa laing hit nga ‘Tabanog”. Pila ray ligid sa panahon, kalit nailado ang  Brain Damage sa Bisrock community, dili na sa ilang “kasipat ug kakalog”, kundili,  nailhan na sila isip usa sa mga respetadong banda. Daghan nang dagkong okasyon sa Sugbu ang ilang naapilan pagtukar. Kadaghan sab sila naka-perform sa Handuraw niadtong wa pa kini mosira, ug karong bag-o, magtukaran na usab sila sa Zzubu. Sila usab ang milingaw sa  mga tawo dihang giablihan ang sangang tindahan sa  Jollibee diha sa Toledo City niadtong Hulyo 22, 2007. Kadungan nila sa maong gig ang laing Bisrock band nga Radstuff nga mitukar usab niadtong okasyona. Apil usab ang Brain Damage sa piniling mga banda nga mitukar atong Rock da Stage Concert nga  gipahigayon sa Millennium Park, ilawom sa Marcelo Fernan Bridge niadtong Hulyo 28, 2007.

Bahin sa ilang album, ang Brain Damage miingon nga sa sunod tuig 2008 pa nila plano i-release kay gusto usa silang tan-ogan og maayo ang tinagik nilang mga kanta aron sakto gyod sa kahinog inig-abot sa panahon. Kasagaran man gud sa ubang banda magdali-dali pagrekord aron makapagawas dayon og album pero lahi ang Brain Damage. Dili sila gusto nga ma-half baked ang pagkaluto sa ilang mga kanta kay alang kanila, kinahanglang kompletos-rekados gyod ang pagkaandam sa ilang album aron seguradong magustohan sa masang Bisrockers ang gihagoan nilang mga obra sa musika.

Ug kun kaniadto mangabang lang sila’g instrumento tungod sa kakuwang sa pinansiyal, karon nakapalit na sila’g tagsa-tagsa ka gamit pinaagi sa ilang paningkamot kay makasapi na man sila’g ginagmay sa higayon nga dunay modapit kanila aron patukaron kun dunay mga okasyon.

Ang Brain Damage buot magpasalamat sa tanang FM stations sa Sugbu nga misuporta sa Bisrock labi na gyod sa 93.1 Smash FM pinaagi kang DJ Ram ug Marit Stinus-Remonde nga maoy orihinal nga nagpasiugda niining tanan. Nanghinaot usab ang grupo sa tanang  mga Bisrockers nga ipadayon ang pagsuporta sa kaugalingon natong musika nga maoy tatak sa rakistang mga Bisdak.  Makontak ang grupo sa text o tawag sa cel. no. 09273706670.