Aksyon, drama at komedi sa GMA

Sa pagtatapos ng Rio Del Mar, isang bagong serye ang ihahatid ng TAPE, Inc. sa mga manonood na tiyak na aabangan at susubaybayan, ang Biglang Sibol, Bayang Impasibol.

Umiikot ang kuwento sa magkasangang buhay ng dalawang pamilyang mortal na magkaaway, ang mga Vaciador at mga Herreros.

Kahit anong iwas ang gawin sa isa’t isa, para namang sinasadya ang laging pagsasalubong ng kanilang landas. Sa pagtakbo ng ating istorya, maraming salasalabit na pangyayari at lihim ang mabubunyag na kapwa di nila inaasahan.

Ang bagong serye na ito ay pinangunahan ng mga beteranong artista sa ating industriya, tulad nina Nestor de Villa, Sylvia La Torre, Delia Razon at Celia Rodriguez, Michael de Mesa, Gardo Versoza, Lara Fabregas, Lyka Ugarte, Lara Morena, Ynez Veneracion, Gladys Guevarra, Dindin Llarena at ng dalawa sa pinakabago at pinakamahusay na artista na sina Jefrrey Quizon at Alessandra de Rossi.

Ang Biglang Sibol, Bayang Impasibol ay may kakaibang timpla. Di tulad ng mga seryeng nakasanayan na. . . ito ay pinaghalu-halong aksyon, drama at komedi. Simula na sa Marso 12, 2001, 1:30-2:00 p.m., Lunes hanggang Biyernes sa GMA Channel 7.