Manang Rose (103)
GUSTO mo talagang malaman kung bakit ako naiinis?’’ tanong ni Eliz kay Gino. Patuloy si Eliz sa paghuhugas ng pinggan.
“Oo! Ano nga ang dahilan? Wala naman akong alam na dapat mong ikagalit.’’
“Wala kang alam?’’
“Wala talaga!’’
Umismid si Eliz. Saka ipinagpatuloy ang pag-huhugas ng mga pinggan.
“Sige na Eliz sabihin mo. Ayokong nag-aaway tayo.’’
Nagpatuloy si Eliz sa paghuhugas ng pinggan.
Hanggang sa lumapit sa kanila si Manang Rose na napansin pala ang pag-uusap nila na parang may pinagtatalunan.
“Gino, Eliz, may pinag-aawayan ba kayo? Kanina ko pa kayo pinagmamasdan. Baka may maitutulong ako.’’
“Kasi po Manang, etong si Eliz, nagagalit sa akin e wala naman akong alam na dapat siyang ikagalit. Hindi ko talaga maisip kung ano ang nagawa ko.’’
“Totoo ba Eliz?’’
Biglang humalakhak si Eliz.
“Ha-ha-ha! Prank lang yun Manang. Gusto ko lang malaman kung ano ang magiging reaksiyon niya—kinagat naman niya.”
“Totoo Eliz, prank lang yun?’’
“Opo Mr. Sumbungero, ha-ha-ha!’’
“Bakit mo naisip yun?’’
“Gusto ko ngang malaman ang reaksiyon mo.’’
“Sige mag-usap kayo nang maayos.’’
“Humingi ka raw ng sorry sa akin, Eliz.’’
“Ano? Ba’t ako magso-sorry sa iyo?’’
“E kasi e pinaglaruan mo ako.’’
“Para itong sira!’’
“O kaya i-kiss mo ako!’’
“Para ka talagang sira!’’
“Kasi hindi ko maintindihan ang ugali mo—sumpungin.’’
“Kasi manhid ka!’’
“Manhid?”
“Oo.”
(Itutuloy)
- Latest