Kaaway ng bayan

Mga pulitikong naluklok sa bayan

Masdan mong mabuti at bundat ang tiyan;

Buhay at salapi nitong sambayanan

Kinakamkam nila at nagpapayaman

Habang nasa puwesto’y walang ginagawa

Kung hindi magnakaw ng mga biyaya;

Sa kanyang tungkulin ay nagpapabaya

Animo’y alamid at gutom na linta!

Di ang pulitiko pati na opisyal’

Ari ng gobyerno ang kinakalakal;

Habang nakaupo sa silyang magalaw

Ay gumagalaw din ang isipa’t kamay!

Malaki ang bahay may magarang kotse

Hindi nahihiya na ipagmalaki;

Gayong ninakaw lang walang sabi-sabi

Sa kaban ng bayan na namumulubi!